Charter Document - 04040080

S et Th dei gratia sacrosancte Maguntine ac Treverensis sed[is] archiepiscopi et dei gratia Ratisponensis episcopus regalis aule cancellanus et dei gratia Herbipolensis episcopus et C dei gratia Vvldensis abbas universis presentem paginam inspecturis salutem et Christo Iesu Divine retributionis anhelus felicis in Christo memorie Diethelmus quondam comes de Toggenburc de bona sua voluntate libero ac sano arbitrio ob salutem anime sue castrum suum Toggenburc necnon et villam suam que vocatur Wila cum omnibus eorum attinenciis et iure proprietatis sicut illa iuste possidebat simul cum uxore sua pie recordationis Guota presentibus diocesano venerabili in Christo Cvonrado Constanciensi episcopo et comite provinciali domino Volrico de Quiburc aliisque quam pluribus viris nobilibus ecclesie sancti Galli libere contulit et donavit in manus scilicet venerabilis in Christo Cvonradi eiusdem ecclesie abbatis Verum saluti patris invidens filius Diethelmus comes iunior memoratam patris donationem cupiens irritare dictum C abbatem et ecclesiam suam preliando invasit ut vel belli violentia memoratum castrum et villam sibi remanciparet Cum igitur ius suum unicuique non solum tueri liceat sed etiam redimere factum est ut interveniente quadam amicabili compositione quam presente diocesano iam pridem memorato necnon et comite provinciali aliisque pluribus nobilibus dictabat nobilis homo dominus Gotefridus de Hohenloh ex consensu partis utriusque arbiter constitutus partes ad pacis concordiam revocarentur Est autem forma pacis ista Iuravit comes Diethelmus comes iunior de Toggenburc ut prescriptam patris donationem ratam et illibatam in perpetuum conservaret et in factum patris voluntarius consentiret ita scilicet ut neque dictum abbatem vel ecclesiam suam vel possessiones seu homines quocumque ad ipsum vel ad ecclesiam suam iure spectantes occasione preconscripte donationis deinceps quoquo modo lederet vel infestaret verum etiam neque pro alia quacumque causa pacem mutuam violaret Quod si forte comes sepe dictus pacem ipsam violare presumpserit ipse suique filii qui et omnes simul cum ipso iuraverant periuri pariter habeantur et tam predia sua quam feoda ab ecclesia sancti Galli habita libere cum omni iure suo ipsi cedant ecclesie non obstante sua vel heredum suorum reclamatione Insuper etiam comes idem cum filiis suis omnibus et sorore castrum memoratum et villam omni eodem modo sicut ille comes antiquus cum omnibus suis attinenciis ecclesie sancti Galli donaverat et ipsi similiter in manus sepe dicti C abbatis presentibus supradictis diocesano et comite provinciali aliisque nobilibus ipso et eodem die ac loco suis propriis manibus donaverunt omni iuri suo pariter renunciantes et hoc sub pretaxato precio quingentarum marcarum quas iuxta dudum dicti nobilis de Hohenloh arbitrium et pacis formam sepe memoratus abbas dicto comiti suisque filiis persolvebat Decreverat enim ita dictus arbiter ut prefatus sancti Galli abbas prenominato comiti quingentas argenti marcas persolveret sed et suis consiliariis centum marcas daret non solum ut ius suum redimeret verum etiam ut predicta bona duplici titulo firmius possideret emptionis scilicet et donationis sicque cum predicto comite pace perpetua gauderet Audivimus autem ab ore sepe dicti Gotefridi de Hohenloh qui fuerat mediator et arbiter preconscripte pacis forme quod per suum arbitrium ita sicut prelibatum est inter memoratas partes venerabilem sancti Galli abbatem et sepe dictum Diethelmum comitem de Toggenburc iuniorem pax dictata fuerit et firmata Audivimus etiam dominum nostrum H Romanorum regem a nobis requisitum illud confitentem quod sepememoratus abbas et coram se et coram patre suo domino Fr inclito Romanorum imperatore illud evidenter et iuxta iuris normam ostenderit et probarit quod prenominatus comes Diethelmus iunior occasione repetendi memoratas possessiones per incendia multa et rapinas plurimas pacem inter se firmatam publice violarit Super hiis itaque que ab ore domini nostri regis accepimus et per arbitrum ipsum dominum G de Hohenloh testantem cognovimus presentem paginam sigillorum nostrorum credentia fecimus insigniri