Charter Document - 04040071

Wir von gottis ginadin abte Wilh von sante Gallin kundin allen den die dizen brieue lesint oder hoerrint lesin ain gelopsami vnde aen warhaet aller der ding so hie nah gischribin stat Ir sont alle wissin vur war dc wir mit hern Walt dem Maeier von Alstetin alsus vberain komin sint vmbe den stosse den wir mit enander in der stat ze Alstetin hettin dc er vns ledig het gilan die muli ze Alstetin in der stat vnde dc vuter vnde du huenrr vnde den mist in der vorgenander stat vnde dc sennelehin vnde swas er darzu rehtis het an sin rehtin cins vnde dc phant dc sinem vatter wart gisecit ze siner muoter ze rehter haenstur von vnserm vorvarin abte Walt saeligim dc lat er vns ledig vnz an zwae phunt phenning vnde ahcehin viertel cern vnde tru malter habern vnde sibin schefil bonin dc sol er niessin in allem dem reht als sin vatter vnde sin muter vnz her genossin hant Vnde won er vns dis het getan darumbe so gebin wir im in der vorgenampter stat allu du giriht die aen maier han sol also dc er nieman ze huse noh ze houe gange noh phende won dc er ie den man ze giriht twingin sol damit dc er im wunne vnde waede virbiet vnde swer im daruber gimaensomet mit wunne mit waede oder mit kaener slaht koph schazze der sol in den selbin schuldin stan als och er stat Swer och houe gut hat den sol man damit vurtwingin als verre ez geraegin mag Och so virjih ich her Walt der Maier von Alstetin dc ich kanen rihter dar secin sol won mich alt minen sun alt aenen der des gotzhuses ist Diz sol vest vnde staete bilibin alle die wil der vorgenampt min herr abte Wilh lept vnde swenn er enist wellin den sin nahkomin vnde ich dis staete habin oder minu kinde so ist ez och staete sweder aber ez aendern wil der haette es gewalt vnde dannen hin sol ez baedinthalb vnder vns stan in dem reht als ez stunt e dirre brieue gigebin wurde Dc aber dc alles war si vnde staete bilibi dc dauor gischribin stat do hankten wir der vorgenampt abte Wilh vnde ich her Walt der Maier von Alstetin vnser ingisigil an dizem brieue Diz bischah vnde wart dirre brieue gigebin ze sante Gallin do von gottis giburte warin zwelfhundert vnde nun vnde nuncig jar an der XVII kal nouen