Charter Document - 04020043

Ich Bockch der Ochsenpeckh thuen kundt alle den die nun sind vnd den die hernach kunfftig werdent die disen brief sehend vnd hoeren lesen das ich vnd fraw Margret mein hausfraw vnd vnnser baider Erben mit verdachtem muet vnd mit guetlichem willen durch recht Ehaft not vnnsers freyen aigens ein lehn das ist Sechs Schilling gelts vnd leit in den Pirchach auf dem hard mit alle dev vnd darzu gehoert versuecht vnd vnversuecht wie das genannt ist mit alle dem Recht vnd wir es gehabt haben dem Gotshaws zu Pawngartennperg zu kauffen haben gegeben da wir es wol getuen mochten vmb Acht phund phenning Wiener muens vnd sein der schon gewert Vnd sein auch desselben Lehenns des vorgenannten Gotshawss gwer nach lanndts Recht in oesterreich Vnd verjehn mer jch Bockh vnd die vorgenannt fraw Margret mein hausfraw vnd vnnser baider Erben ist das jem auf das vorgeschriben lehn vor Recht clagt das sull wir veranntwurten so vns das kundt wirt getan als recht ist Wo wir das nicht tuen ze hannt sey wir demselben Gotshaws schuldig beliben dreissig phund phenning wienner munss vnd sol der lanndtrichter jn des gericht wir mit haws sein gesessen an all clag vnd an alles Recht mit vnnserm guetlichen willen von vns phandt geannttwurten fur dreissig phund wiener phenning dem vorgenanten Gotshaws Vnd das alles das hievor geschriben ist staet vnd vnzebrochen furbas beleib so geb wir Ich Bockh von Ochsennpach vnd frau Margret mein hausfraw vnd vnnser baider erbn demselben Gotshaws disen brief zu einem Vrchund diser sach an den die werden herren her Janns von Cappell vnnd der hauch von Reichenstain durch vnnser pett willen ir Innsigel haben gelegt wann wir selbs nicht Innsigel haben des sind gezewg her Janns von Cappell her hauch von Reichenstain her Marquart von Osterberch her Ott von chornspach her hertneit von Chuleub her Chunrat von Vlachenneckh her hainrich vnd her Marquart die oeder her Vreitel von Winthag hainreich der Imptzinger hainrich der Fleischess Eckhart vnd hainreich die Smidaer vnd darzu manig pidber man Diser kauf ist geschehen do von Crists geburd erganngen waren Zwelfhundert Jar vnd darnach in dem Achtundnewntzigisten Jar an Sannd Kathrein tag