Charter Document - 04020041

Ich Herweich der Holczer von chlamm khund offenlichen allen den die disen brief sehent hoerent oder lesend das ich meins freyen aigens ein lehen dacz Weisching vnd ein hofstat dacz ganng die baiden guet gegeben hab dem gotshaws von Pawngartenperg zu dem liecht mit all dem recht vnd ich Sy han gehabt mit frawen Petersen meiner hausfrawen gueten willen vnd aller vnserer Erben die genant sind Herweich Vlreich Jacob alhait Elspet Jeut Margreth mit solicher beschaidenhait daz der Guster all jar ein kertzen mach von zwain phund Wachs vnd die an Vnnser frauentag zu der Liechtmess aufsteckh dotz frawenalter vnnd bin derselben baiden guet des vorgenanten gotshawss gewer Aber nach meinem tod so sollen die vorgenanten meinen Erben der zwaier guet gewer sein dez Gotshawss von Pawngartenperg vnd sullen sy veranntwurten ob dasselb gotshaws yemand anspricht vmb dieselben zway guet nach meinem tod vnd der vorgenannten frauen Petersen meiner hausfrauen Vnd was dem vorgenannten Gotzhaus an disem glub abget daz sol ez haben auf all den vnd die vorgenanten mein Erben von mir angeuelt nach mein vnd meiner hausfrauen tod Vnnd dass [das] Stet vnd vnzerbrochen beleib was hieuor geschriben ist dez gib ich dem Abbt Rapoten vnnd der Samnung von Pawngartenperg disen brief zu einem Vrchund der versigelt ist mit herren Vtreichs Innsigel von Cappeln vnd mit dem meinem dez sind gezeug her Vlreich von Cappellen her Pilgrim vnd her Chunrad sein vettern her houch von Richenstain her hartmut von Smida her Vlreich sein Sun her Vlrich vnd her leutold von Mitterberch her Marquart von Osterberch her Wetzel von Erwing her ditrich von Aw her Vlrich vnd her Wernhart die sechsenecker her Chunrat von Vlachnek Vlreich sein brueder vnnd darzu manich biderman baide Ritter vnd knecht das ist geschehen da von Christ geburd ergangen sind Tausend zwaihundert vnd Sibenundnewntzig Jar an Sannd Gregorj tag