Charter Document - 04000141

Ich Otte van walde der alte vergihe vnd tvn chvnt allen den di disen prief ansehent lesent oder hoerent lesen di nv lebent oder her nach chvnftich sint Daz ich mit guetem willen zder zeit dv ichz wol getuen mohte han gegeben allez daz Aigen daz ich han ze Rorbach vnd daz Lehen an dem Garten vron Geisel Chadolts Tochter van Lahsendorf der meiner Housvrowen prueder was nach meinem Tode fur rehte aigen als ich ez vnd mein vodern in Rehter aigens gewern haben her praht ze Velde zedorfe versuht vnd vnuersuht vnd allen ir frumen da mit zeschaffen verchouffen versetzen oder geben swem si welle an allen irresal vnd mag ovch daz wol getvn wan ich zerehter fvrziht getailt han mit allen meinen vrevnden vnd meinen Erben Daz diseu rede staet vnd vnverwandelt beleibe dar vber so gib ich der vorgenanten vron Geiseln disen prief zeiner vrchvnde vnd zeinem ewigen Gezivge diser sache mit meinem jnsigel vnd mit Hern Otten jnsigel van wildekke vnd mit wernharts jnsigel van dem Heuslein di ouch gezivch sint Mit den Gezivgen di her nach geschriben sint Her vlreich van wolfgestorf Her wlflnch van walde Her Otte van walde Her ditrich van dem Heuslin Jans van wolfgestorf wolfger van dem Roer Otte vnd dietmar sin prueder vnd ander piderbe Levte genvge Diser prief ist gegeben datz Sande poelten dv waren van vnsers herren Gebvurt ergangen Tausent jar zwai Hvndert iar jn dem Nevn vnd Neutzigisten iar an Sande Nyclas tach