Charter Document - 04000125

Ich Chvnrat von Chappelle tun chvnt allen den di disen brif ansehent vnd horent di nv sint vnd noch chvnftig werdent daz ich dem erberm abt vnd der samnung ze Wilhering durch got vnd durch ir gebet han geben lieplich vnd redlich daz recht vnd die vreiung in meinem geriht daz ich von minen herren von Scvnberch ze lehen han daz weder ich noch mein Rihter von des vorgenanten chloster levten oder gutern dhain schuld rihten sulen nven alein dise drei sachen daz ist den totslag vnd di devf vnd di nothnuft di zv dem tott zihent vnd di dreier sachen einer schuldich werdent der sol ich mich oder min Rihter vnderwinden als si mit gurtel sint vmbuangen vnd sulln mit ir gut swaz daz ist icht haben ze schaffen Aber di andern sache vnd schulde sol der vorgenant abt oder swem er ez enphilht auf sinem gut rihten als er daz selbe reht vnd di selben vreiung von alten ziten her von minen herren von Schovnberch hat gehabt vnd daz Chloster her hat braht vnd auch in auz nam min her Heinrich der oelter von Schovnberch an sein selbs stat vnd an siner vetern stat do ich daz geriht von im enphie Daruber so tun auch ich dem vorgenanten Chloster di gnad daz weder abt noch sein levt vor minem Rihter solln zu reht sten oder mit dhain sachen beswart vnd gemwet werden besvnder swas gein im oder gein sinen levten in minem gericht ze sprechen ist daz sul er selbs enten als dann reht ist vnd daz in daz stet vnd vnuerchert ebichlich beleibe so gib ich in disen brif ze vrchunde versigelt mit minem Insigel vnd bestegt mit den zevgen di hie geschriben sint daz ist her Vlrich von Chappelle min veter her Heinrich von volchenstorf her Heinrich von Lonstorf her Heinrich von Travn her Rudolf vnd Heinrich von Alharting her Heinrich von Alharting der Rihter her Walchvn von percheim vnd ander piderb levt genuch die da bei waren Daz ist geschehen do von Christes geburt waren Tausent iar vnd zwaihundert vnd in dem drev vnd nevntzigisten iar an vnser vrovntag ze der Lichtmessen