Charter Document - 04000122
| Charter Number: | 04000122 |
|---|---|
| Cartulary Title: | Wilhering, Stiftsarchiv |
| Charter Language: | Latin |
| Charter Origin: | Lay |
| Charter Type(s): | Surrender |
| Date: | 1291 |
| Date type: | Internal, A.D., Feast |
| Resource Link(s): |
Monasterium.net |
Charter:
Cum per nebulosam obliuionis caliginem aut sinistre contencionis instanciam quam pluries geste rei veritas ambiguitatis et peruersionis obruatur dispendio restat vt facta quelibet duratura efficaci et fideli scripturarum testimonio incorporentur noticie posterorum Ea propter nos Henricus senior de Schaunbergk vniuersos scire volumus tam presentes quam futuros presencium inspectores quod ob honorem gloriose virginis Marie et nostrorum progenitorum remedium omni juri et actioni que nobis competebat aut competere videbatur in ecclesia jn Lonueld quam religiosi viri Abbas et conuentus Monasterii in Wilhering ordinis Cisterciensis mediantibus nostri testimonii assertionibus veridicis et interpellationis fideli aminiculo optinuerunt ab ipsis quondam alienata indebite sub consueta forma ob stipulacionem que vulgo Fuertzicht dicitur renunciamus et renunciamus plenius in hoc scripto volentes et decernentes finaliter vt prefati Abbas et conuentus predictarum ecclesiarum jn Lonueld cum terminis et pertinenciis suis vniuersis in possessione quieta teneant et justo proprietatis titulo perpetuo possideant libere nullo in hac ipsis per nos et nostros successores impedimenti detrimento et obstaculo in posterum aliqualiter obuiante Vt igitur predicti Abbas et conuentus in posterum nullius insultacionis aut ablacionis violenciam paciantur aut senciant in ecclesia memorata ipsis et conuentui in Wilhering presentes literas tradidimus sigilli nostri robore communitas in testimonium euidens et cautelam Datum anno domini MCC jn octaua Epiphanie