Charter Document - 04000121

Wand wir von menschlicher art alle totlich sein vnd der heut lemtich ist vber ein chvertz weil nicht en ist dauon swaz ceitlich vnd redlich geschieht dez welle wir niemen lazzen vergezzen Ich Wernhart von Hyppleinsdorf tven chunt allen den den diser prieze hanten chumt di alz an lemtich sint oder hernach chumftich sint daz ich dem erbern herren Abpt Chunraten vnd seiner sampnung datz Wilhering vnd vnser vrowen goteshaus ze vordrist verschauffet han vmb vumf vnd vuntzich phunt niwer phenning meins rehten aigens zwen hof datz Tevffental vnd han ich mich der vurzicht getan mit meiner hant vnd mein Havsvrowe Seburch mit samt mir vnd ist daz geschehen mit meines prueders Hermans guetleichem willen vnd seiner Hovsvrowen di sich der vorgenant hof mit sampt mir vuerziht habent getan daz si vuerbaz chain ansprach mit samt mir darauf niht haben schullen vnd han auch Abpt Chunraten mit mein triwen daz gelubt ob iemen wer der daz selb aigen an spreche daz ich daz versprechen schol an allen steten verre oder nohen als des landes recht ist ains vnd dreizich iar vnd ain tach an alle sein mve vnd sein chost vnd ob ich nicht en wer so schol iz mein prueder Herman tven an meiner stat Vnd tvn auch chunt vnd lob ez mit mein triwen ob ich daz indert zespreche daz an disem brief geschrieben staet also daz der vorgenant Abpt der zwaier hof di ich im gegeben han indert entwert wuerd so schol ich im oder mein Hovsvrowe oder meinew chint ob mirs got geit vnd wer wier niht so schol iz tvn mein brueder Herman oder sein Hovsvrowe oder sinew chint Verschied aver wier paid an erben der dann der nechst ber ist vnd vnsers aigens weltich ist der schol im antwuerten als vil gult avz vnserm rechten aigen als vil der ist di si datz vns gechauffet habent Vnd daz daz vnser wort vnd vnser wille also sei daz wevesten vnd westeten wir mit vnser paider insigel vnd des Winchler vnd vnsers vettern von Ruspach Vnd des gewerftz ist gezeuch her Leutold von Chunring her Ortlieb von Winchel her Wernhart von Ruspach vnd ander piderb leut gnvech Ditz ist geschehen do von Christes geburd sint vergangen Tausent iar zwai hundert iar ains vnd nevnzich iar des nechsten Vreitages vor aller Heiligen tag vnd tun dar vber chunt allen den di disen brief an sehent daz ich gegeben vber di zwen hoef vumf vnd sibentzich phenning gult an echern vnd an wisen