Charter Document - 04000118
| Charter Number: | 04000118 |
|---|---|
| Cartulary Title: | Wilhering, Stiftsarchiv |
| Charter Language: | Latin |
| Charter Origin: | Lay |
| Charter Type(s): | Protection |
| Date: | 1291 |
| Date type: | Assigned |
| Resource Link(s): |
Monasterium.net |
Charter:
Albertus dux Austrie et Stirie dominus Carniole Marchie ac portus Naonis fideli suo Eberhardo de Walse judici prouinciali super Anasum gratiam suam et omne bonum Cum de iure virorum religiosorum Abbatis et Conuentus monasterii in Wilhering Cisterciensis ordinis dilectorum nobis quod habent in Ecclesia in Lonuelde Ecclesie sue in Greymhartssteten filiali titulo attinente fidelis et sufficiens priuilegiorum suorum tenor et ydonea assertio nostram conscienciam plenius informaret dolentes super ipsorum fratrum iniuria si quam ex alienatione iniusta passi sunt hactenus in eadem immo cupientes eis possessionis ac iuris sui recuperatione debita piis affectibus subuenire finaliter fidelitati tue conmittimus et mandamus precise uolentes quatinus memoratam Ecclesiam in Lonueld cum suis pertinentiis vniuersis predictis Abbati et Conuentui contradictione remota restituas et assignes nullum ipsis fratribus in dicta ecclesia et bonis suis inferens aut inferri permittens inpedimentum dispendium uel offensam Datum wienne III Idus Januarii