Charter Document - 04000114

Nos Wernhardus dei gratia Patauiensis Ecclesie Episcopus Notum facimus vniuersis presentes litteras inspecturis quod Nos multam necessitatem Monasterii in Willehering ordinis Cisterciensis nostre dyocesis prouida consideratione pensantes quod videlicet hospitalitatis oneribus incessanter insistit Ideoque volentes de paterna clementia idem monasterium in hiis quantum possumus adiuuare venerabili fratri domino Chunrado Abbati et fratribus Monasterii ipsius et eorum successoribus capituli nostri accedente consensu benigne concedimus vt de redditibus et obuentionibus ecclesie parrochialis in Greymharsteten in qua jus obtinent Patronatus decem librarum denariorum redditus annuos suis perpetuis vsibus applicent et adiungant ita quod plebanus dicte ecclesie qui pro tempore fuerit ipsis teneatur annuatim de quantitate huiusmodi respondere saluis iuribus ac decimis que in dicta parochia ipsis conpetunt ab antiquo Predicti quoque Abbas et fratres beniuolenciam per nos ac nostros predecessores ac capitulum nostrum ipsis pluries exhibitam attendentes pro se suisque successoribus ex liberalitate propria promiserunt quod dum noster successorum nostrorum ac patauiensium canonicorum obitus ipsis innotuerit missas vigilias et omnia alia faciant que in depositione fratrum suorum facere consueuerunt et nichilominus nostrum videlicet episcopi anniuersarium obitus diem cum debita decencia peragant annuatim Abbas quoque dicti monasterii qui pro tempore fuerit fratribus suis singulis annis pitancias et consolacionem faciat eo die Super premissa vero nostre concessionis gratia prefato monasterio in Willehering presens porrigimus instrumentum nostro ac nostri Capituli sigillorum munimine roboratum Datum Patauie Anno domini MCC Nonagesimo primo jdus Martii