Charter Document - 04000101

Wir wernhart vnd Heinrich bruoder von Schowenberch tun allen den chunt di disen brief vernement daz wir durch besunder libe di wir haben zu dem erbaerigen Abbte Heinrich von Alderspach dem selben gotshaus di gnade getan doch ze voderst durch got daz man im ein pfunt saltzes des weiten bantes zeinem mal in dem iar fueren sol datz ascha fuer vngemoutt ewichlich ouch suelen si her ouf wider wazzer fuern vngemout swaz in wirt wines in ir wingarten vnd swaz in getraides wirt ouf ir aekchern vnd sol daz ir bot bewaern daz daz vorgenant guot in worden sei ouf ir aekchern vnd in ir wingarten swaz si vazz beduerffen nuwe oder alt di suln ouch vngemoutt fuergen Si sullen ouch vngemoutt fueren gezimber daz si mit bezzern ir hoef ob si verbrunnen oder so foul wurden daz si zimbers bedorfften als vil als ir notduorft darzu ist Darueber geben wir disen brieff versiegelt mit vnsern insigeln zeinem vrchuende mit disen gezeugen Der Erbaerig Abbte Wolfram von Wilhering vnd bruoder Houg bruder gerhart von Alderspach Herrn wernharts sune von Schowenberch Her Leutold Heinrich vnd wernhart di brueder Ch[unrat] von furt Ludwich Schiver Haertneit von Lichtenwinchil Ul[rich] vnd Leutold bruder von Mitterberch Ch[unrat] Stal von Julbach vnd ander biders laeutt Der brieff ist geben ze Schowen[berch] nach Christes geburt ubir tausend iar zwai hundert in dem vier vnd ochzigsten iar an sant Mathiastag