Charter Document - 03980171

Nos Wernhardus dei gratia Ecclesie Patauiensis Episcopus ad perpetuam rei memoriam presentibus confitemur quod cum in Ecclesia de domo sancti Floriani quoddam durasset statutum contra Calumpniatores et Criminatrices fratrum editum temporibus ab antiquis quod videlicet eisdem Criminatoribus eiectionem perpetuam a consorcio et a fraternitate inducebat dilecti in christo fratres venerabiles Aynwicus prepositus Heinricus decanus ac Totus Conuentus Ecclesie prenotate prudenter aduertentes quod huiusmodi eiectionis pena inferebat periculum animarum taliter eiectorum idem statutum vtpote inconueniens paribus votis et vocibus de nostro beneplacito reuocauerunt et omnimodis cassauerunt Sed quod predictos calumpniatores et criminatores quos dei timor a malo non reuocat penalis seueritas coherceat a peccato predicti prepositus decanus et Conuentus Ecclesie de domo sancti Floriani pro se suisque successoribus concorditer statuerunt vt si quis fratrum alium fratrem infamare vel talem notam infamie sev crimen eidem obicere uel inponere presumpserit vnde fama denigretur infamati nisi obiectum crimen legitime probauerit contra illum preterquam talis calumpnia contra calumpniatorem huiusmodi probata fuerit legitime idem infamator sev calumpniator carcerem ecclesie ingrediatur humiliter uel si rebellis fuerit includatur in eodem per integrum annum penitenciam peracturus et si idem a carcere fugerit uel extractus fuerit violenter nullatenus resumatur ad ecclesiam nisi primum in carcere annum compleat penitencie deputatum a quo etiam carcere prepositus et Conuentus ipsum non debent ante finem anni aliqualiter absoluere nisi ex iusta et rationabili causa fiat Sed ut predictis calumpniatoribus et infamatoribus metu pene excessus sui presumpcio sit horrori adiectum est pene premisse ut postquam taliter incarceratus in carcere annum penitencie exegerit absoluatur a carcere et in ecclesia tamquam hospes perpetuo nouissimum stallum teneat voce Capituli careat nisi tandem meritis sibi suffragantibus prepositus et conuentus ipsum ad statum pristinum duxerint reponendum Ad hec predicti prepositus et decanus et conuentus statuerunt concorditer vt is fratrum contra quem legitime probatum fuerit quod alicui de fratribus intulerit minas mortis carcerem predictum ingrediatur uel rebellis vi includatur in illo in eodem in penitencia iuxta prepositi et conuentus arbitrium permansurus Verum quia nos predicta statuta tam necessitate vrgente quam vtilitate suadente pro statu temporis vidimus plurimum oportuna eadem in omnibus suis articulis de certa sciencia confirmamus auctoritate ordinaria in hiis scriptis Mandantes sub virtute sancte obediencie ea perpetuis temporibus inviolabiliter obseruari Datum et actum in sancto Floritiano Anno domini MCC Nonagesimo Nono pridie Kalendas Augusti presentibus nostro et predictorum prepositi et conuentus de sancto floriano sigillis conmunitis in testimonium predictorum