Charter Document - 03980152
| Charter Number: | 03980152 |
|---|---|
| Cartulary Title: | St. Florian, Stiftsarchiv |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1294 |
| Date type: | Internal, A.D., Calendar |
| Resource Link(s): |
Monasterium.net |
Charter:
Wernhardus dei gratia Patauiensis Ecclesie Episcopus omnibus christi fidelibus presentes litteras inspecturis salutem in domino sempiternam Peticionibus pro augmentando cultu diuino et pro confouenda iusticia rationabiliter nobis oblatis tanto fauorabiliores nos haberi conuenit quanto verius eius propiciationem et gratiam cuius in hac parte negocium agitur obtinemus Sane cum dominus Albero de Pvochaim patrum suorum honoraturus sepolchrum sibique facturus perhenne remedium secus hospitale in vechlaprvk a piis progenitoribus olim fundatum Conuentualem ecclesiam diuina suffragante clemencia fundare intendat nobis ad memoriam sollicite reuocauit quod sui felicis recordacionis progenitores memoratum hospitale cum adiacente sibi barrochia aliisque suis pertinentiis vniuersis Ecclesie sancti Floriani de nostrorum predecessorum consensu et consilio tradiderunt vt videlicet fratres predicte domus deberent eadem tam in temporalibus quam eciam in spiritalibus regulariter perpetuo gubernare Et quia quidam prepositorum ipsius Monasterii ad idem hospitale et barrochiam longo tempore a suis fratribus antea procurata quosdam postmodum presentauerunt clericos seculares commissione sibi facta taliter abutendo Prefatus Albero ut salubre suum propositum eo facilius optato posset effectui mancipare deuocione nobis humili supplicauit vt quod in eiusdem hospitalis et barrochie dispendium factum esset minus prouide per prelatos prouida sollicitudine et paterna benignitate reuocare et corrigere dignaremur concedendo videlicet denuo prouisionem dicti hospitalis et barrochie Monasterio antedicto Nos vero pie deuocioni ipsius annuere cultumque ampliare diuini nominis exemplo patrum precedentium cupientes tenore presencium duximus statuendum ut cedente uel decedente presenti Rectore in vechlaprvk prepositus et Conuentus prefati Monasterii nullum de cetero secularem clericum ad eam presentare debeant set eidem propriis fratribus prouideant quemadmodum hactenus facere consueuerunt vtiles ibidem instituendo et inutiles remouendo prout Ecclesie uiderint expedire Predicto Alberoni nichilominus indulgentes vt iuxta sui desiderii conceptum in eodem loco Collegium instituat eidem de domo sancti Floriani ad cuius dispositionem et hospitale et barrochia spectare uidentur Canonicis regularibus prouidendo Et ne quispiam successorum nostrorum possit infringere de cetero huius priuilegii nostri racionabilem concessionem presentem paginam ipsi Monasterio super hoc traditam sigilli nostri inpressione fecimus insigniri Acta sunt autem hec Anno domini Millesimo CC Nonagesimo Quarto XVIIII kalendas Septembris