Charter Document - 03980135

Albertus dei gratia Dux Austrie et Stirie Dominus Carniole Marchie ac Portus naonis uniuersis iudicibus ac Mutariis per Austriam constitutis fidelibus suis dilectis gratiam suam et omne bonum Cum deuoti nostri dilecti prepositus et Conuentus ecclesie sancti floriani ab omni theloneo siue muta ubique per austriam tam in terris quam in aquis per priuilegia Romanorum imperatorum et regum ac etiam predecessorum nostrorum Ducum austrie quemadmodum in autenticis eorum vidimus ac per confirmationem nostram munificam sint exempti Vobis mutariis uniuersis et singulis districtius inhibemus ne quis vestrum ab eisdem in antea siue sit in terris siue in aquis quocumque tempore anni nomine thelonei siue mute aliquit exigat vel requirat Sed et vobis uniuersis iudicibus districtione simili inhibemus ne quis vestrum in dicte ecclesie exemptionis preiudicium victualia eiusdem seu homines siue colonos ecclesie attinentes aliquorum debitorum pretextu detineat aut detineri permittat nisi prius a dicto preposito vel a suis officialibus iusticia requiratur Si vero causa alicuius questionis immediate contra prepositum vel suam ecclesiam habeatur nequaquam ab aliquo vestrum bona ipsorum seu homines occasione talis questionis detineri volumus nisi prius ab eo quem viceaduocatum eidem pro tempore prefecerimus ecclesie iusticia fuerit requisita Quod si contrarium feceritis preter indignationem nostram penam centum librarum auri in suis expressam priuilegiis incidetis Datum Neunburge in die sancti Floriani martyris Anno domini MCC octogesimo VIII