Charter Document - 03980093
| Charter Number: | 03980093 |
|---|---|
| Cartulary Title: | St. Florian, Stiftsarchiv |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1265 |
| Date type: | Internal, Calendar, Papal |
| Resource Link(s): |
Monasterium.net |
Charter:
Clemens episcopus seruus seruorum dei Dilecto filio [] Cantori Patauiensi Salutem et apostolicam benedictionem Peruenit ad audientiam nostram quod tam dilecti filii [] Prepositus et Conuentus Monasterii sancti floriani ordinis sancti Augustini Patauiensis diocesis quam predecessores eorum terras possessiones redditus decimas domos et quedam alia bona eiusdem Monasterii datis super hoc litteris interpositis iuramentis factis renuntiationibus et penis adiectis in grauem ipsius Monasterii lesionem nonnullis clericis et laicis aliquibus eorum ad uitam quibusdam uero ad non modicum tempus et aliis perpetuo ad firmam uel sub censu annuo concesserunt quorum aliqui super hijs litteras confirmationis in forma communi a sede apostolica impetrasse dicuntur Cum igitur nostra intersit lesis Monasterijs subuenire discretioni tue per apostolica scripta mandamus quatinus ea que de bonis eiusdem Monasterij per concessiones huiusmodi alienata inueneris illicite uel distracta non obstantibus litteris penis iuramentis renuntiationibus et confirmationibus supradictis ad ius et proprietatem ipsius Monasterij legitime reuocare procures Contradictores per censuram ecclesiasticam appellatione postposita compescendo Testes autem qui fuerint nominati si se gratia odio uel timore subtraxerint censura simili appellatione cessante compellas ueritati testimonium perhibere Datum Perusii Kalendis Decembris Pontificatus nostri Anno Primo