Charter Document - 03980051

In dem namen der gottlichen vnd der vngeschaiden Driualtichait Leupolt Hertzog ze Osterreich vnd ze Steyr sprichet also Wand got ist ein lon vnd ein gellter aller guten dingen Do von haben wir gut zuversicht daz uns vor got grozzen lon pringe vnd mere ob wir mit guotem willen veruenchlichen betrachten den Gotshawsern vrid vnd scherm Dovon tun wir bechant allen Christen lewten Mit vrehund diser Schrifft Daz wir das Gotshaws das sand florians haws ist genant das wir ausgenomenlichen lieb haben das enneher langew zeit von werltlicher Richter gewalt ze vnrecht ist beswaert vnd manigvalltichlichen geseriget von allen vnsern sinnen vnd mit allem vleizze haben zerloset vnd gefreyet von aller werltlicher Richter gewalt Also daz dicz selbe Gotshows Ortolfen von Volchenstorf der vnser Dinstman ist vnd derselben gegend Lantrichter do ditzselbe Gotshows inne leit hat gegeben Vierdhalb Hundert phuent gaebiger phenning ze vnsrer gegenwurte vnd daz derselbe Ortolf alles das recht das er het an lewten oder an aygen oder an swigetanen gut desselben Gotshowses von dem rechte werltlichs gerichts aufgab Otten dem Tuomvogtt von Regensburch Vnd der Tuomvogtt gab vns dasselbe auf Darzu derselbe Ortolf da sein pruder Herwort was ze gegenwurte vnd auch mit gutem willen gab demselben Gotshaws mit allem aygenlichem rechte seines aygens ze Gruenenaw vnd ze Leimperge auf dem Letten Das jerlich rechter gullt auf zwaintzik phunt gullt ist geachtet Ditz selbe aygen mit allem dem Rechte vnd iz im was gegeben gab vns dasselbe Gotshaws ze widerwechsel vnd ze erstattunge des gerichts In allem disem recht vnd der erstattunge vnd wir ez netten enphangen von dem gotshaws Lihen wir dasselbe gut dem Tuomuogtt vnd er demselben Ortolfen alsam ze widerwechsel vnd ze erstattunge des aufgegeben Lantgerichts dem offt genanten Gotshaws Hie von wellen wir daz daz Gotshaws von staetem vrid vnd von ganczer vreyhait sich vrew vnd alles das Recht vnd allew di schulldigung der iz e was schulldig vnd gepunden werltlichem gericht geb wir mit eins Swertes opfer auf sand florians allter Vnd alles das Recht der Vogtaye v[u]ber alles des Gotshaws gute in dem gerichte das widerwechsel ist Das auch mit diser selben Hantvesste ist bestaetigt geben wir auf denselben allter Mit eines schilldes gaeb vmb den ewigen lon Vnd ze erledigen vnd vrein dits gotshaws an allem dem das im zugehort swie ez ist genant lewt aygen gebawen oder vngebawen versucht oder vnuersucht das ez hewt hat oder ymmer furbas gewinnet Ez sey wise waide Jaid vischpaen wiltpaen vnd alles das veberal das das lantgerichte vor der zeit diser hantvesste het oder mochte getziehen oder mochte gepringen in schulldigunge das vreyen wir allesampt Dar zu so staetig wir das von disem tage vnsers aufsats von erst daz ymmer furbas dhainem Lantrichter sey vrlaublich dhaines taydings weise zehaben indert auf des gotshows gute Noch dhain zeit noch dhain stat beschaiden durch gericht noch dhain dingstat haben oder stiften Noch auf des gotshaws gut noch anderswo dhainen menschen des Gotshaws mugen getwingen daz iz ze Recht vor im stee Ez sein pawlewt oder aygenlewet oder czinslewet vmb dhainer slacht saeche noch das dhain werltlicher Richter auf des gotshows gute noch an dhainer staet von des gotshaws leweten swi si sind genant von chauffe noch von fure dhainen weise dhainew Mauett noch dhainen zol sol nemen noch aischen Wir wellen auch daz allew di sache di an des Gotshows gut erwachsen vnd sich v[u]ben di ze beredung oder ze pusse stende werden daz di vor alles Lantgerichts gewaelt oder voellge so gentzlich sein gevreyet vnd ausgenomen daz alain desselben gotshaws Broebst vnd sein amptlewt vmb alle di selben sache sullen ir aisch haben vnd swas si erayschent das sullen si mit Recht volfuren Geschicht das also daz ein mensch das dem Gotshows zugehoret chuentlich wirt griffen an der Hanthafft der dief oder des todslags oder mordes oder notnunft oder an swigetaner schullde di des schulldigen menschen tod mag eruollen wand sich geistlicher lewt orden solhes gerichtes volfuerung nicht vnderwindet so sol der voegt den wir nach des Broebstes pet in haben gegeben denselben schuldigen menschen dem Lant Richter antwurten ze verderben Also daz alles desselben menschen guet ez sey varundgut oder wi iz haizze dem Gotshaws alain werde behallten Jdoch also daz schulldiger lewt aische sullen haben alain des gotshaws amptlewet vnd wo oder wenn si di vinden so sullen si di selben schaiden von in ynd tun ab des gotshaws gut innerhalb eines Maeneits vnd sullen sich an denselben vertzeichen irr hantvesste Rechtes vnd ist das Gotshaws furbas nicht gepunden yemant ze antwurten vmb diselben lewet swaes si tuen Alsam geschicht ob ein mensch das des Gotshaws nicht ist chlait hintz ainem das dem gotshaws zugehort vor dem Brobst oder vor seinen amptleweten vnd daz der bechlait vor dem Broebst Rechts waigert so sol der chlager sein chlag fur legen dem den im der brobst an vnsrer stat ze schermer hat genomen vnd ist derselbe bechlait demselben schermer Rechtes wider alsam an der stat sol sich der Brobst eins so smaechlichs vraeuels menschen ausnemen vnd seiner hantvesst Rechtes an im vertzeichen vnd sol furbas sich vmb in nicht annemen Darzu ander sachen swie si sein genant si sein vmb aigens gerichtt oder vmb varund gut di si gegen leib getziechen oder gegen dem gut oder auf schaden Ez sey pan oder aechte oder vechte beredung vnd alle geschicht als losung v[u]beruanch Gavmlos Etze Nachtschaden an lewten vnd an aygen Das alles sullen des gotshaws lewt amptlewte mit gericht volfuren Nu sullen allew die di disen prief ansehent oder vernemment daz wizzen fur war daz wir aller diser sache vnd der Rechte sunderlichen vnser schaidung so verdechtichlichen mit so gewizzer ausmerchung der schriefft haben gemainchlichen gestaetigt daz do mit allew ansprach vnd allew v[u]bler lewte vnrechtew anvertunge werd widertriben di wellen bechrenchen disen vnsern aufsatz Mit dem wir vns vleizzen vnd werben allen weise daz ditz Gotshows mit staetem vride vnd mit ymmer wernder vreyung beleih Vnd daz alle vnser Erben oder ander vnser nachchomen das wizzen daz si weder mit hin lehen noch mit dhainer fromden weise dise vnser vreiung hantuesste nicht mugen zebrechen noch gechrenchen Geschicht ez aber von dhainem vnrechtem rat daz von vnsern Erben oder von andern vnsern nachchomen mit bechrenchung diser vreihait vnrecht geschieht das wellen wir daz iz dhainen weise dhain chrafft nicht haben mug Nach diser sache sichtichlicher offenunge so chrefftig wir disen prief mit vnsers warhafften Insigel zugab an disen selben prief cze staetigunge vnsers endhafften aufsats Vnd daz ditz alles mit ymmer wernder staet sey veruangen So sterkeh wir iz mit Chaiser Otten Insigel vnd mit Chaiser fridreichs Insigel alsam mit den zeugen di hie stent geschriben Graf vlrich von Chlamme Ott der Tumvogt Vlreich von valchenberch Hadmar von Chunring Alber vnd Hadmar sein sun Vlreich Strune Rudolf von Potendorf Weichart der Truchsaetz Chadolt vnd Weichart sein sun Adolt von Chienawe Dietmar von Liechtenstain Ott von Chrems Hadmar von Pavmgarten Herman von Chranchperch Vlreich der Esel Perchtolt von Wideruelt Otte von Perchtoltstorf Ott von Pirbowm Vlreich von Chernabrunne vlreich von Marbach Perchtolt von Emmerberch Heinrich von prunne Leupolt der Schenkch Alber von Greymstain Ruprecht de Stal Dietmar von Chulivbe Herwort von Volchenstorf Dietreich von windekk Deinrat von Kappellen Oppolt vnd Heinreich di Kamrer vnd anderr piderber lewt vil Das ist geschehen auf der wies bei naern vnd volpracht ze Dornpach Geben ze wyenn mit der hannt Vlreichs des offen Schreiber am xvj tag kalendas Julij da man zalt von Christs gepurd M Jar CC Jar jm virden Regnante domino ffriderico Romanorum rege et rege Sycilie glorioso anno regni eius secundo Regni vero Sycilie XV