Charter Document - 03980027
| Charter Number: | 03980027 |
|---|---|
| Cartulary Title: | St. Florian, Stiftsarchiv |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1158 |
| Date type: | Internal, A.D., Episcopal |
| Resource Link(s): |
Monasterium.net |
Charter:
Chovnradus celesti gratia patauiensis episcopus cunctis ecclesie sue christique fidelibus salutem in perpetuum Si erga loca diuinis mancipata seruitiis liberales fuerimus pro eterna saluatione promerenda profuturum nobis hoc credimus Cum itaque Rudegerus et Porno frater suus de holzhusen ecclesie nostre ministeriales quoddam haberent predecessorum nostrorum pontificum et nostra concessione beneficium in pago stadele hinc inde per loca ex quarundam parte decimarum egit et peregit hoc cum ipsis illius temporis venerabilis prepositus sancti Floriani domnus Heinricus peticionibus et rebus suis interuenientibus quod ipsi cedere de suo iure uolentes decimationes illas omni decisa in futurum contentione in manus nostras sine malo ingenio resignarent et easdem gratia et concessione nostra in usus fratrum beati Floriani deuenire et transfundi postularent Nos itaque amore loci quem una cum antecessoribus nostris episcopis uouere ampliare et promouere libenter intendimus peticionibus eorum non segniter aquieuimus et receptam ab eis dictam modo beneficii sui portionem pro eterna remuneratione religiosis sancti Floriani canonicis in stipendii sui supplementum super addidimus Quod quia fauore omnium nostrorum qui aderant fidelium nec non adtestatione atque presentia quorumdam fratrum nostrorum de choro patauiensis ecclesie celebriter factum est necessarium uidebatur scripto pariter et sigillo nostro peractionem illam corroborare ne uel obliuio uel aliqua hominum contraditio ualeat ullatenus aut modernis aut futuris temporibus eam labefactare Acta sunt hec in domo Sancti Floriani anno post incarnationem dominicam MCLVIII indictione VI Anno uero episcopatus nostri XI bulla sigilli nostri infra sicuti euidens est ad maiorem certitudinem presenti pagine affixa Testes sunt et cognitores rei de choro patauiensi Rovdbertus decanus Heinricus scolasticus Jacobus diaconus Otto capellanus et cognatus episcopi Cazelinus laureacensis plebezanus Ex nobilibus uero Gebhardus comes de uiehtenstaen Heinrich et frater eius Gebhardus de iubelbach Ex ministerialibus autem ecclesie Engilbertus de struben Waltherus de glanech Ovdalricus et frater eius Sibot Adalbertus episcopi camararius Walchun iudex Rudolf de perchaim ceterique