Charter Document - 03970108

Ich Dietrich der Scheuch von Dobra tvn chvnt allen den di nv sint vnd her nach chvnftich werdent Daz ich dem ersamen herren Apte Chvnrade von Sytansteten vnd dem goteshavse han ze chavffen gegeben daz gvt datz der Linden an dem Rastperge mit miner havsfrowen Chvnegvnden vnd mit miner chinde vnd mit miner prvder Seifrides vnd Heinriches gvtem willen vnd wil ovch des vorgenanten gvtes vnd ovch min hausfrowe vnd miniv chint des vorgenanten herren apte Chvnrades vnd der samnvnge gewer sin als wir gelobt haben vnd als wir svln an aller stat Daz in daz staete beleibe ewichlich von vns vnd von vnsern nahchomen so hab wir in dar vber gegeben disen prief ze einem vrchvnde vnd ze einem ewigen gezevge gevestent mit minem insigel vnd mit miner frivnde insigel hern Heinriches des eltern preuhavens hern Heinriches von dem wasen hern Heinriches von Horowe vnd meines vetern Dietriches des voytes von Hage Des sint gezevge her Hertweich von dem wasen Her Friderich Chresselinch her Heinrich der Straeler Herman der Nevnberger wolfker der wasener vlrich pavzz Friderich pavzze Alram der stiller vnd ander biderbe levte Daz ist geschehen do von Christes gepvrtte waren tavsent Jar zweihvndert Jar in dem Nevn vnd Nevnzigisten Jar ze aller Hiligen Messe