Charter Document - 03970105

Ich Ditrich der Schenche von Dobra tvn chvnt allen den die nv sint vnd her nach chvnftich werdent Daz ich Hern Hertweigen von dem wasen han gesatzt minen hof datz Hertweichstein vnd zwo hveb hinter dem hertweigstein fvr zwai min drizzich pfvnt wienner pfenninge mit miner havsfrowen vron Chvnegvnden vnd mit mines svns Ditriches vnd mit miner prvder Seifrit vnd Heinriches gvtem willen mit der bescheidenheit daz ich oder min havsfrowe oder min svn losen suln daz vor genant gvt oder min prvder ob wir niht gelosen mvgen von weinahten dem tage vber driw Jar vnd ist der Hertweich niht so svl wir losen von dem Straler vn von sinen chinden vnd von sinem eidem Hermanne dem Nevnberger Geschehe des niht daz wir ztem tage vnd in der vrist daz vorgenant gut niht enlosten so soll ich Ditrich vnd min havsfrowe vnd min son ob ich niht enbin hern hertweige daz selb gvt vff geben oder dem Straler vnd sinen chinden ob er niht ist vor dem herzoge vnd dem landes herren in Osterriche vnd sol ouch ich vnd min havsfrowe vnd min son desselben gvtes gewer sin ze hof vnd ze taidinge vnd aller stat vud er sin bedarf Swor wir des niht entaeten vnd swaz im der dinge ab gieng als an disem prief geschriben ist so sei wir im schvldich sehzich pfvnt wienner pfenning vnd sol die haben vf elliv div vnd wir haben vnd ob ich verzikh di zit vn den tach daz ich niht enlose so sol vns der hertweich her zv geben nah zweir manne vnser beider frevnde rat Dar vber han ich im gegeben disen prief gevestent mit minem Insigel vn mit miner prvder beider Insigel Des sint gezevg her Otte von der Erl Her heinreich vnd her Ott vn wolfker von dem wasen Vlrich vn friderich die Pavzzen Chvnrat von ladendorf vnd ander biderb levte Daz ist geschehen do von vnsers herren gebvrt waren tavsent Jar zwei hvndert Jar in dem oht vnd Nevnzigisten Jar vor weinahten in der Chottemper