Charter Document - 03970101

Ich Fridrich von Hausekk vergib offenlich an disem brief und tun auch chunt allen den di disen brief ansehent oder horent lesen daz sich di Luzz und di Rayn di zwischen dem Gotshause sant Peters datz Regenspurg sint und zwischen unser Frowen sant Marein Gothaus datz Seiteinsteten habent datz Hauptortt des Ugenpachs und gent uber den Eidenperch von dem Eidenperch in die Haselleiten von der Haselleiten auf den Eybeinsezzel von dem Eybeinsezzel hintz Uebelprunne daz sint di Luzz und di Rayn und waz ich in dem Luzz han der hintz Regenspurch gehort dazselb gut daz het ich von demselben Gotshause ze rechtem Lehen und han dazselb gut dem guten herren sand Peter und sinem Gotshause aufgegeben und han es herwider gewunnen ze leibgeding ze mein aines leib den Turn datz Grosten der gepowen ist auf hrn Nordweins Cheler und allez daz ich in der Gregent datz Grosten han von dem pistum ze Regenspurch ez sei verlihen oder unverlihen ez sein Aekcher Wis Wismat Visch Waid Geiaide Vorst Holz Swaig Gelt und Ungelt Aigen laut edel und unedel arm und reich versuht und unversuht gebauen und ungebauen Wazzer und Wazzerslauf und die zwai tail des Zehenten gehort hintz Manse und drei Vischhub die gehorent den Eysenpantelen zu nach minem tod und niht e daz vorgeschriben Gut daz in dem Luzz leit der da hintz Regenspurch gehort und daz ich von demselben Gotshause zu lehen het dazselb Gut mit allem sinem Nutze wird dem guten herren sand Peter und sinem Gotshaus datz Regenspurch nach minem Tode allez ledich und daz daz stet beleib han ich disen brief ze einem Urchund gegeben versigelten mit minem Insigel minem liben Herren dem Bischof Heinrich und sinem Gotshause datz Regenspurch Datz ist geschehen datz Pechlarn do von Christes Geburt waren MCCXCV Jar des nechsten Tages vor sand Lucein tag