Charter Document - 03970085
| Charter Number: | 03970085 |
|---|---|
| Cartulary Title: | Seitenstetten, Stift |
| Charter Language: | Latin |
| Charter Origin: | Royal |
| Charter Type(s): | Confirmation |
| Date: | 1279 |
| Date type: | Internal, A.D., Calendar, Regnal |
| Resource Link(s): |
Monasterium.net |
Charter:
Rudolfus dei gracia Romanorum Rex semper Augustus Vniuersis Imperij Romani fidelibus presentes litteras inspecturis graciam suam et omne bonum Nobis nuper Wienne pro tribunali sedentibus in placito generali venerabilis Rudolfus abbas Monasterij de Seytensteten deuotus noster dilectus per sentenciam coram nobis hoc peciit diffiniri Si princeps aliquis Comes aut nobilis zelo deuocionis inductus aliqua predia siue bona ad ipsum proprietatis iure spectancia alicui Monasterio conferat propter deum retento tamen sibi Iure aduocaticio in eisdem et idem postmodum nullo sibi herede uel successore legitimo succedente decedat Vtrum aduocacia bonorum huiusmodi que sic uacat ad ipsum terre principem cum alium successorem non habeat merito debeat pertinere Hac itaque questione sub forma prescripta proposita assidencium et astancium nobis principum Comitum nobilium et aliorum nostrorum fidelium multitudo sentenciando taliter diffiniuit quod in casu predicto Ius aduocacie in bonis huiusmodi ad neminem alium quam ad verum terre principem pleno iure deuoluitur et transfertur Nos itaque prefatam sentenciam utpote rite latam et prouide approbantes ipsam auctoritate presencium confirmamus In cuius rei testimonium presens scriptum Maiestatis nostre sigillo duximus roborandum Datum wienne XV kalend Julij Indicc VII anno dominj Millesimo ducent septuag nono Regnj vero nostri anno Sexto