Charter Document - 03970054
| Charter Number: | 03970054 |
|---|---|
| Cartulary Title: | Seitenstetten, Stift |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1263 |
| Date type: | Internal, Calendar, Papal |
| Resource Link(s): |
Monasterium.net |
Charter:
Urbanus episcopus seruus seruorum dei Dilectis filijs [] Abbati et Conuentui Monasterij sancte Marie de Sitansteten ordinis sancti Benedicti Patauien diocesis Salutem et apostolicam benedictionem Cum a nobis petitur quod iustum est et honestum tam uigor equitatis quam ordo exigit rationis ut id per sollicitudinem officij nostri ad debitum perducatur effectum Sane petitio uestra nobis exhibita continebat quod bone memorie Wicmannus Archiepiscopus Magdeburgen quasdam terras uidelicet Ibsizam ad eum ratione persone sue spectantes cum omnibus iuribus et pertinentijs earum ita quod uos quandam ibidem cellam construeretis in qua Monasterij uestri aliqui monachi morarentur uobis pro sue ac progenitorum suorum animarum remedio contulit diuine intuitu pietatis prout in litteris inde confectis sigillatis sigillo ipsius Archiepiscopi plenius dicitur contineri Nos itaque uestris supplicationibus inclinati quod per eundem Archiepiscopum in hac parte pie ac prouide factum est ratum et firmum habentes id auctoritate apostolica confirmamus et presentis scripti patrocinio communimus Nulli ergo omnino hominum liceat hanc paginam nostre confirmationis infringere uel ei ausu temerario contraire Si quis autem hoc attemptare presumpserit indignationem omnipotentis dei et beatorum Petri et Pauli apostolorum eius se nouerit incursurum Datum apud Vrbemueterem V kal Junij Pontificatus nostri Anno Secundo