Charter Document - 03970052

Urbanus episcopus seruus seruorum dei Dilectis filijs [] Preposito ecclesie S Magni Altemanno de Rotenecke Canonico Ratisponen et [] Thesaurario Eisteten Salutem et apostolicam benedictionem Significarunt nobis dilecti filij [] Abbas et Conuentus Monasterij de Sytansteten quod cum inter ipsos ex parte una et uenerabilum fratrem nostrum [] Episcopum et dilectos filios Capitulum frisingen ex altera super iure patronatus ecclesiarum de Aspac de Waydhouen et de Holenstein pactauien diocesis coram dilecto filio [] plebano plebis de Wienna auctoritate apostolica questio uerteretur idem plebanus cognitis cause meritis et iuris ordine obseruato diffinitiuam pro eisdem abbate et Conuentu sententiam promulgauit Cum autem ijdem Episcopus et Capitulum se ab huiusmodi sententia sedem apostolicam appellasse dicentes super appellatione huiusmodi ad dilectum filium [] abbatem de Tirhoupt ipsius sedis litteras ipapetrassent tandem [] scolasticus Augustensis Cui idem abbas de Tirhoupt commiserat super hoc totaliter uices suas dilecto filio [] Decano ecclesie Ardacen de facto causam subdelegauit eandem Cumque ijdem Episcopus et Capitulum ipsos abbatem et Conuentum coram eodem Decano pretextu subdelegationis huiusmodi citari fecissent ex parte dictorum abbatis et Conuentus fuit excipiendo propositum coram eo quod cum ipse scolasticus non esset a principe delegatus nec ipse causam eandem decano committere nec idem decanus pretextu subdelegationis ei a dicto scolastico facte de causa eadem cognoscere poterat nec debebat Et quia idem Decanus huiusmodi exceptionem admittere contra iustitiam denegauit ipsi sentientes ex hoc indebite se grauari ad nostram duxerunt audientiam appellandum Quocirca discretioni uestre per apostolica scripta mandamus quatinus uocatis qui fuerint euocandi Et auditis hinc inde propositis quod canonicum fuerit appellatione postposita decernatis facientes quod decreueritis auctoritate nostra firmiter obseruari Testes autem qui fuerint nominati si se gratia odio uel timore subtraxerint per censuram ecclesiasticam appellatione cessante cogatis ueritati testimonium perhibere Quod si non omnes hijs exequendis potueritis interesse duo uestrum ea nichilominus exequantur Datum apud Vrbemueterem IIII Non Junij Pontificatus nostri Anno Secundo