Charter Document - 03970014

In nomine sancte et indiuidue Trinitatis Fridericus diuina fauente Clementia Romanorum Imperator Augustus Si ad salutem anime et peccatorum nostrorum remedium impensa mancipatis diuino cultui locis adiutoria nobis prospicere speramus uniuersis quoque eodem pietatis studio nitentibus fauorem et auxilium imperialis gratie nostre non immerito prestare debemus quatenus mercedis que pro caritatis operibus ab eo qui est karitas promittitur una cum ipsis participes efficiamur Cum itaque dilectus princeps noster wicmannus uenerabilis Magdeburgensis ecclesie archiepiscopus partem cuiusdam saltus quem habet in Austria de proprietate et allodio suo cenobio sancte Marie in Sydenstat laudabili piaque intentione contulerit et coram nobis in sollempni curia nostra Nurinberch de fauore et consensu nostro in legitimam eis proprietatem contradiderit ad preces ipsius intuitu maxime diuine misericordie et gloriose dei genitricis semperque uirginis Marie collati saltus partem cum omnimoda utilitate que in salis ferriue uenis siue fodinis in ea reperiri poterit eidem abbacie imperiali auctoritate confirmamus et presentis priuilegij robore communimus Statuentes et nostre sanctionis edicto accuratius decernentes ut nulla omnino persona magna uel parua secularis uel ecclesiastica huic nostre confirmationi temeritatis ausu contradicere aut aliquatenus contraire presumat Quod qui inconsulte attemptauerit in ultionem temeritatis sue uiginti libras auri puri componat medietatem fisco imperiali et reliquam partem claustro iniuriam passo Huius rei testes sunt Cunradus Maguntinus archiepiscopus Albertus saltzburgensis archiepiscopus Otto Baberibergensis episcopus Gotefridus Wirceburgensis episcopus Conradus Ratisbonensis episcopus Otto Eistetensis episcopus Otto Frisingensis episcopus Teobaldus patauiensis episcopus Albertus Tridentinus episcopus Heinricus pragensis episcopus Fridericus dux sueuie Fridericus dux Boemie Liupoldus dux austrie Ludewicus dux Bawarie Bertoldus dux de Merano Otto marchio Misnensis Dedo marchio orientalis Otto marchio Morauie Bertoldus marchio de Andehs et alii quam plures Signum domini Friderici Romanorum Imperatoris Inuictissimi Ego Johannes jmperialis aule cancellarius uice domini Cunradi Maguntini archiepiscopi et Germanie archicancellarij recognoui Actum anno dominice Incarnationis MCLXXXVII Indict V Regnante domino Frederico Rom Imperatore gloriosissimo et semper augusto Anno Regni eius XXX VI Imperij vero XXX IIII Datum in solempni curia Ratisbone III Non Marcij Amen