Charter Document - 03960076

Uniuersis sancte matris ecclesie filiis presentes litteras inspecturis nos dei gratia Petrus patriarcha Constantinopolitanus Johannes Lundensis Basilius Jerosolimitanus Egidius Bituricensis Philippus Salernitanus Bonaventura Ragusinus archiepiscopi Maurus Amiliensis Peronnus Larinensis Franciscus Senogaliensis Sabbas Militensis Romanus Croensis Waldebrunus Auelliensis Guido Cameracensis Thomas Rosscussensis Wolradus Brandeburgensis Jacobus Aceruensis Jacobus Millopotonensis Adamarus Oscensis Jacobus Calcedonie Aumardus Lucerie episcopi salutem et sinceram in domino caritatem Alma mater ecclesia de animarum salute sollicita deuocionem fidelium per quedam spiritualia munera remissiones videlicet et indulgentias inuitare consueuit ad debitum famulatus honorem deo et sacris edibus impendendum ut quanto crebrius et deuocius illuc confluat populus christianus mutuis saluatoris graciam precibus implorando tanto celerius delictorum suorum ueniam et gaudia regni celestis consequi mereatur eterna Cupientes igitur ut capella in cymiterio Scotorum Wienne Patauiensis diocesis que gloriosi martiris Georgii nomine noscitur insigniri et a Christi populo deuote uisitetur dignarumque laudum preconiis iugitur ueneretur omnibus uere penitentibus et confessis qui ad predictam capellam in festis subscriptis videlicet Natiuitatis Ephiphanie Resurrectionis Ascensionis domini in singulis festis beate Marie beatorum Petri et Pauli et omnium apostolorum sanctorum Johannis Baptiste et Euangeliste sancti Michaelis archangeli et in festo omnium sanctorum in festis beatorum Laurentii Stephani et Georgii martirum sancte Marie Magdalene beatorum Katarine et Margarete uirginum in festis sancte Crucis in dedicatione capelle memorate et per octauas predictarum festiuitatum octauas habentium causa deuocionis et honoris accesserint aut ibidem diuini cultus misteria uel sermonem reuerenter audierint in festis prenotatis uel qui ad fabricam luminaria uestimenta ornamenta seu ad aliqua alia necessaria manus porrexerint adiutrices uel in ultimis uoluntatibus quicquam facultatum suarum legaverint sustentacioni capelle prelibate nos de nostri veri saluatoris misericordia dulcisque matris sue gracia nec non et beatorum Petri et Pauli apostolorum et omnium sanctorum meritis et precibus confidentes quilibet nostrum quadraginta dies de iniunctis sibi penitentiis dummodo consensus diocesani ad id accesserit misericorditer in domino relaxamus In cuius rei testimonium sigilla nostra presentibus duximus apponenda Datum Rome apud sanctvm Petrum anno domini millesimo ducentesimo nonagesimo septimo pontificatus domini Bonifacii pape octavi anno tertio