Charter Document - 03960053
| Charter Number: | 03960053 |
|---|---|
| Cartulary Title: | Schottenstift [Wien] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1282 |
| Date type: | Internal, Papal |
| Resource Link(s): |
Monasterium.net |
Charter:
Martinus episcopus seruus seruorum dei dilectis filiis [] abbati et conuentui monasterii sancte Marie Scotorum Wiennensium ordinis sancti Benedicti Patauiensis diocesis salutem et apostolicam benedictionem Cum a nobis petitur quod iustum est et honestum tam uigor equitatis quam ordo exigit rationis ut id per sollicitudinem officii nostri ad debitum perducatur effectum Sane petitio uestra nobis exhibita continebat quod carissimus in Christo filius noster Rudolfus rex Romanorum illustris habens ad monasterium uestrum specialem affectum ius patronatus quod tunc in ecclesia sancte Marie de Gaunesdorf Patauiensis diocesis obtinebat uobis pia et prouida liberalitate concessit venerabilis fratris nostri Patauiensis episcopi loci diocesani ad id accedente consensu prout in patentibus litteris inde confectis plenius dicitur contineri Nos itaque uestris supplicationibus inclinati quod super hoc pie ac prouide factum est ratum et gratum habentes illud auctoritate apostolica confirmamus et presentis scripti patrocinio communimus Nulli ergo omnino hominum liceat hanc paginam nostre confirmationis infringere uel ei ausu temerario contraire Si quis autem hoc attemptare presumpserit indignationem omnipotentis dei et beatorum Petri et Pauli apostolorum eius se nouerit incursurum Datum apud Vrbem ueterem V idus Aprilis pontificatus nostri anno secundo