Charter Document - 03960022
| Charter Number: | 03960022 |
|---|---|
| Cartulary Title: | Schottenstift [Wien] |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1230 |
| Date type: | Internal, A.D., Calendar, Episcopal |
| Resource Link(s): |
Monasterium.net |
Charter:
Nos Wichardus dei gratia ecclesie Patauiensis episcopus notum facimus vniuersis presentes litteras inspecturis quod cum excellentissimus dominus noster Rudolfus Romanorum rex semper Augustus motus zelo pietatis et iusticie ecclesiam parrochialem in Gaunestorf ad presentacionem suam racione ducatus Austrie pertinentem de consensu et voluntate heredum suorum ecclesie sancte Marie Scoterum in Wienna in recompensacionem decime que eidem de coquina ipsius domini regis ex iure antiquissimo debebatur ac capelle sancte crucis in Tulna pertinentis ad ecclesiam Scotorum predictam in qua idem dominus noster rex ad laudem et gloriam Iesu Christi construere intendit monasterium sanctimonialium pro suorum remedio peccatorum cum decimis et omni alio iure quod in ipsa tam in presentacione quam alias habuit absolute dederit perpetuo possidendam prout in instrumentis ipsius super hoc datis expresse et lucide continetur petitione ipsius domini nostri regis precedente dilecti in Christo fratres Thomas abbas [] Prior totusque conuentus ecclesie Scotorum predicte nobis supplicauerunt humiliter et deuote vt ipsorum defectus et desolacionem ecclesie misericorditer adtendentes graciam et donacionem de prefata ecclesia Gaunestorf eis factam ratificare et confirmare nostris litteris dignaremur Nos igitur ad ipsorum instanciam humilem et deuotam moti conpassione debita circa ipsos et eorum ecclesiam que proh dolor ex malo statu terrarum in reditibus et possessionibus suis nimium est collapsa donacionem et graciam de ecclesia sepedicta Gaunestorf factam ipsis et ecclesie memorate accedente venerabilis capituli nostri Patauiensis pio fauore pariter et consensu ratam habemus et gratam eamque tenore presentium in nomine domini confirmamus ita tamen quod ad ipsam ecclesiam Gaunestorf per dominum abbatem et conuentum suum nobis perpetuus vicarius presentetur qui talis ut speramus ydoneitatis existat quod per ipsum antedicte ecclesie in spiritualibus et temporalibus utiliter sit prouisum cui etiam talis prebenda per dominum abbatem et conuentum deputabitur sicut decet de qua circa nos et alios quoslibet superuenientes et aduenientes sibi possit honeste et decenter hospitalitatis debitum exercere quod si non fieret nos ex officii nostri debito emendare defectum huiusmodi cogeremur In cuius rei testimonium et cautelam presentes damus litteras nostro et venerabilis capituli nostri predicti sigillorum robore communitas Datum Patauie anno domini MCCLXXXXIIII kalendas Julii pontificatus nostri anno primo