Charter Document - 03960019

In nomine sancte et indiuidue trinitatis amen Gebhardus dei gracia Patauiensis episcopus in perpetuum Ex cum pontificalis officii quam domino disponente suscepimus nostra Interesse dinoscitur ut circa tranquillitatem quarumlibet ecclesiarum nostre diocesis paterna sollicitudine uigilantes ad amplificandum pariter ipsarum profectum prouide quantum in nobis fuerit intendamus Quocirca innotescere cupimus presentibus et futuris quod cum inter Chunradum patruum nostrum et Leotoldum patruelem nostrum comites de Plaien ex una parte et abbatem Scotorum in Wienna et prepositum de sancto Ipolito ex altera super decimis in Pulka controuersia uerteretur et abbas et prepositus iam dicti in tantum aduersus iam dictos comites in querela processerint vt etiam iudices a sede Romana obtinuerint contra eos nos terminandam huiusmodi controuersiam assumentes sic inter ipsos tractauimus quod idem abbas et prepositus renunciantes litteris apostolicis impetratis in nostrum et venerabilis fratris abbatis de sancta cruce et decani de sancto Ipolito arbitrium compromiserunt una cum ipsis comitibus bona fide et penitus sine fraude Nos itaque cum hec decime in Pulka in tres partes equaliter diuidi debeant quarum unam comites reliquas uero duas abbas et prepositus recipiunt cum prefatis coarbitris nostris sumus taliter arbitrati uidelicet ut omnes decime que soluentur de cultura uinearum quas ipsi comites nunc habent aut in perpetuum habebunt in dolium communitatis que teilpotge dicitur immittantur insuper ipsi comites cum officialibus et ministerialibus atque ciuibus et uniuersis hominibus suis disponent fideliter ut debito modo soluant decimas que et solute in idem mittentur dolium de quo tunc dolio cuilibet debita et equa portio fideliter assignetur Insuper de decimis uille Leutacher sic ordinauimus vt si quando de Ottone de Heidenrichesteine et eius heredibus uacauerint deinceps nulli ali quatinus infeudentur sed in commune mittantur vt quilibet de illis similiter equam et debitam recipiat portionem Nos quoque in omnes decimarum huiusmodi detentores sententiam excommunicationis iam tulimus statuentes ut si quis has decimas non plene soluerit si commonitus infra mensem non satisfecerit per plebanum de Pulka qui pro tempore fuit denunciabitur excommunicatus et si plebanus illum per mensem denunciare distulerit ipse ab officio sit suspensus Vt igitur hec ut premissa sunt perpetuo permaneant inconuulsa presentem paginam conscribi et conscriptam nostri impressione sigilli fecimus consignari Huius rei testes sunt Siboto Patauiensis canonicus Ulricus plebanus de Pulka Heinricus de Chiowe Pilgrimus de Tannenberch Tiemo de Rezbach Albero rufus Otto de Steine Heinricus de Werde Wernhardus Zweck Vlricus de Milensbach et frater eius Wolframmus et alii quam plures Actum apud Pulka XVI kal Febr anno domini MCCXXII Indictione vndecima Pontificatus nostri anno primo