Charter Document - 03950019
| Charter Number: | 03950019 |
|---|---|
| Cartulary Title: | Schlägl, Stift |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1264 |
| Date type: | Internal, A.D. |
| Resource Link(s): |
Monasterium.net |
Charter:
In nomine Patris et Filii et Spiritus sancti Ego Budiboy et Berchta vxor mea de Zkaliz omnibus presentem paginam inspecturis summi regis gratiam promererj Cum euum nostrum adeo se reuolutione sedula retorqueat quod acta presentis temporis in obliuionem deueniant futurorum nisi scripture testimonio solidentur scire uolumus singulos et vniuersos quod nos Deum pre oculis habentes simulque considerantes quod qui parce seminat parce et metet et qui seminat in benedictionibus de benedictionibus et metet vitam eternam contulimus ecclesie sancte Marie in Slage in subsidium fratrum Deo inibi seruientium de communi consensu et bona uoluntate omnium heredum nostrorum villam in Schintav que uxorem meam iure hereditario contingit cum omnibus suis pertinentiis cultis et incultis tam in plano quam in bosco cum riuis et siluis et omnibus piscationibus omnibusque decimis quas in predicto predio percipere solebamus pro remedio anime nostre et omnium progenitorum nostrorum et sobolum pleno iure ad memoriam reuocantes quod bonarum mentium est timere culpam ubi culpa minime reperitur jta ut si scienter uel ignoranter aliquem hominum in suis facultatibus lesi cum beato Zacheo quadruplum defraudatis restituente veniam consequi merear ab ipso qui celum et terram continet et qui dat salutem vniuersis Illud adicientes si aliquis in iam dicta hereditate furti uicio aut uulneris letalis plaga siue nocturno incendio ad dampnationem vite quod absit repertus fuerit salua uniuersarum que possidet rerum iustitia que ad prepositum ipsius loci pertinent solummodo ut cinctus erit cingulo seculari iudicio committatur Termini autem predicte ville extenduntur usque ad aquam que dicitur Chlaffundez wazzer Ne autem talis nostra donatio ab aliquo successorum nostrorum valeat irritari presentem paginam damus predicte ecclesie et fratribus ibidem nostri sigilli munimine et testium subscriptione firmiter roboratam in euidens testimonium et cautelam Vt huius rei testimonio per scripti litteras conprobetur volumus essentialiter conprobare Nota testium dominus Wernhardus de Morspach canonicus Pataviensis ecclesie dominus Otto cantor et canonicus eiusdem ecclesie dominus Reinoldus canonicus eiusdem ecclesie dominus Witigo de Chrumnav Pilgrimus de Valchenstein Heinricus de Waldek Hadenricus et patruus suus Rvodigerus de Heichenbach Alhkerus de Johenstein Syboto miles de Sprinzenstein Perhtoldus miles de Haidendorf Wernhardus et Marchwardus fratres de Monte Wernhardus miles et frater suus Hainricus cognomento Ravber Wilhalmus de Senneperge Wluingus de Haelfenberch Albertus de Rvzeinsdorf Vlricus et Wernhardus fratres de Gotergaezzinge Acta sunt hec anno ab incarnatione Domini MCCLXIIII