Charter Document - 03950013

Alexander episcopus seruus seruorum Dei Uniuersis Christi fidelibus per Patauienses Pragenses et Ratisponenses ciuitates et dioceses constitutis salutem et apostolicam benedictionem Quoniam ut ait apostolus omnes stabimus ante tribunal Christi recepturi prout in corpore gessimus siue bonum fuerit siue malum oportet nos diem messionis extreme misericordie operibus prouenire et eternorum intuitu seminare in terris quod reddente Domino cum multiplicato fructu recolligere debeamus in celis Firmam spem fiduciamque tenentes quoniam qui parce seminat parce et metet et qui seminat in benedictionibus de benedictionibus et metet uitam eternam Cum itaque sicut dilectus filius abbas monasterij de Mileuz Premonstratensis ordinis Pragensis diocesis nobis significare curauit idem divine retributionis obtentu quoddam monasterium in loco de Plaga Patauiensis diocesis ad honorem beate Marie sanctorum Regis martiris Nicolai et ad diuine laudis obsequium de nouo edificare ceperit opere sumptuoso nec ad tanti consumationem operis proprie sibi suppetant facultates vniuersitatem uestram monemus et hortamur in Domino atque in remissionem uobis iniungimus peccatorum quatenus prouide attendentes quod inter holocausta uirtutum illud Deo acceptabilius creditur quod de pinguedine caritatis offertur ac quod dignum existit quod huiusmodi noua plantatio piis fauoribus ylarescat de bonis uobis a Deo collatis pias elemosinas et grata caritatis subsidia eidem operi erogetis ut per subuentionem uestram opus ipsum ualeat consumari et uos per hec et alia bona que Domino inspirante feceritis ad eterne possitis felicitatis gaudia peruenire Nos enim de omnipotentis Dei misericordia et beatorum Petri et Pauli apostolorum ejus auctoritate confisi omnibus uere penitentibus et confessis qui ad hoc manum porrexerint adiutricem centum dies de iniuncta sibi penitentia misericorditer relaxamus [Presentibus post septennium minime valituris quas mitti per questuarios districtius inhibemus eas si secus actum fuerit carere iuribus decernentes] Datum Laterani idibus februarij pontificatus nostri anno tertio