Charter Document - 03950012
| Charter Number: | 03950012 |
|---|---|
| Cartulary Title: | Schlägl, Stift |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1253 |
| Date type: | Internal, A.D. |
| Resource Link(s): |
Monasterium.net |
Charter:
Acta sollempniter delet obliuio nisi litterarum fulciantur stabilj firmamento Inde est quod ego Mechtildis vidua relicta Chvnradi cum filio suo Rvdigero vocati de Heichenbach omnibus successoribus nostre posteritatis nec non et vniuersis littere presentis inspectoribus notum esse uolumus quod nos kuriam nostram in Wantschaben domui sancte Marie in Slage contulimus terciam partem pro peccatis et salute nostra nec non et pro remedio animarum cognationis nostre duas uero reliquas partes eiusdem curie pro pecunia uidelicet XXXII libris dedimus pleno iure Fatemur insuper quod frater Rudigeri scilicet Wernherus beate memorie pro iniuria quam predicte domuj intulerat emendanda duos mansos in Horowe ipsi domui cum adhuc uiueret contulit personaliter et concessit cuius donationem ratam habentes consensum nostrum in hac parte et fauorem beniuolum exhibemus tam in supradicta curia in Wantschaben quam in eisdem duobus mansis in Horowe coram altari in sepe dicta ecclesia sancte Marie juri nostro integraliter renunciantes Ne uero de hac donatione legitima ab aliquo heredum nostrorum dubitari possit in posterum coram ydoneis testibus Heidenrico scilicet nostro cognato de Heichenbach Chalhoho et Leupoldo fratribus de Valchensteyn Pilgrimo de Tanneberch Sybotone de Sprinzensteyn Wernhardo de Monte Vlrico Gusner Chunrado Chraenzinger presentem paginam sepe dicte domui sancte Marie dedimus sigilli nostrj robore confirmatam Prefati nichilominus testes eundem contractum conscriptum presentibus suorum sigillorum testimonio signauerunt Datum in Slage VIII jdus marcii anno ab incarnatione Domini millesimo ducentesimo quinquagesimo tercio