Charter Document - 03950008
| Charter Number: | 03950008 |
|---|---|
| Cartulary Title: | Schlägl, Stift |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1236 |
| Date type: | Internal, A.D. |
| Resource Link(s): |
Monasterium.net |
Charter:
Rvedgerus Dei gratia ecclesie Patauiensis episcopus omnibus tam presentibus quam futuris salutem in eo qui est vera salus Ad noticiam omnium cupimus peruenire quod Chalhochus de Valchenstain ministerialis ecclesie nostre in loco qui vocatur Slag fundauit cenobium in honore Dei et genitricis sue Marie cum consensu et voluntate predecessoris nostri bone memorie Wolfkeri Fvndacionem igitur illam filius suus Chvnradus in nostra presencia renouauit et in hoc magis roborauit quod a iure aduocacie recessit et sine omni vtilitate promisit eundem locum ipse et sui successores defendere et iniurias proclamare Preterea partem decimacionis quam in illis locis habuit nobis libere resignauit et nos easdem decimas ad peticionem illius Chvnradi tradidimus illi loco Cenobium inquam illud ecclesiam et decimas cum omnibus attinencijs cultis et incultis tam in Bauaria quam in Austria confirmamus et committimus pleno iure dilecto in Christo fratri nostro [preposito in Osterhouen] [Ortholdo preposito] tam in spiritualibus quam in temporalibus vt ipsum regat secundum regulam beati Augustini et ordinem Premonstratensem Quicunque ergo cenobium illud in captura piscium in succisione arborum vel qualicunque modo in redditibus suis habitis et habendis indebite lederit vel dampnificauerit maliciose idem sentenciam excommunicacionis beatorum apostolorum Petri et Pauli ac eciam nostram se nouerit incurrisse Vt autem fundacio illa permaneat inconvvlsa et ne heredes predicti Chvnradi presumant eam in aliquo pregrauare nos presens priuilegium sigillo nostro et capituli ac eciam ipsius Chvnradi et testium subscripcione fecimus conmuniri Hij sunt testes Chunradus decanus Patauiensis Gotfridus archidiaconus et thesaurarius Chunradus tvmplebanus Eberhardus de Vevchtenpach Rvedgerus de Lanstorf Meingotus de Waldek Henricus Czeblinus Chunradus decanus Ratisponensis et canonicus Patauiensis Ministeriales ecclesie Patauiensis Chunradus de Valchenstain Ortolfus et Henricus fratres de Waldek Pilgrimus de Tannberch et alij quam plures Datum Patauie anno Dominice incarnacionis MCCXXXVI