Charter Document - 03950004
| Charter Number: | 03950004 |
|---|---|
| Cartulary Title: | Schlägl, Stift |
| Charter Language: | Latin |
| Charter Origin: | Religious |
| Charter Type(s): | Surrender |
| Date: | 1218 |
| Date type: | Internal, A.D., Calendar |
| Resource Link(s): |
Monasterium.net |
Charter:
Nos frater Chundericus totusque conuentus monasterii in Langhaym uniuersis uolumus fore notum tam presentibus quam futuris quod in loco qui Slage nuncupatur honorabilis uir dominus Kalchochus de Valckenstein ad honorem Dei et beate virginis cenobium ordinis nostri construxerat et fundarat in quo fratres nostri ordinis ex nostro monasterio primo instituit et locauit et eundem locum cum omnibus ad dictum locum spectantibus nobis et ecclesie nostre commiserat et donarat perpetue possidendum Et cum in sepe dicto cenobio fratres ecclesie nostre aliquot annis cum magnis defectibus permanerent quadam uice penuria et defectu uestium continue aggrauati locum relinquentes desolatum nocturno tempore pariter inde ad nostrum monasterium redierunt Predictus uero Kalchochus fundator prefatum locum nobis renunciantibus monasterio et abbati Milocensi et ordini Premonstratensi tradidit et assignauit de nostra spontanea uoluntate Ea propter ad petitionem fundatoris pretactum locum seu cenobium in Slage cum omnibus ad eundem spectantibus tradimus monasterio et abbati in Milewsk sicuti nostro ordini et nostre ecclesie traditus fuerat et commissus renunciantes omnibus priuilegijs nostris habitis et habendis et cuilibet iuri nostro tam canonico quam ciuili Jn cuius rei testimonium presentes litteras dedimus sepe dicto loco monasterio in Milewsk conuentui et fratribus sigilli nostri munimine consignatas Datum anno domini MCCXVIII XII kalendis Julij