Charter Document - 03940104
Charter Number: | 03940104 |
---|---|
Cartulary Title: | Reichersberg, Stift |
Charter Language: | German |
Charter Origin: | Lay |
Charter Type(s): | Renunciation |
Date: | 1290 |
Date type: | Internal, A.D., Feast |
Resource Link(s): |
Monasterium.net |
Charter:
Ich Livtolt von Chvringe Schenke in Oesterreich vergihe und tvn chunt allen den die noch leben vnd her nach chvmftich werdent daz mein vodern von alten dingen vnd ich vntz her ein vogitai haben gehabt und haben si herpraht in rehter erbe vogitai gewer von des lants herren avf der herren gvet von Richersperge auf drin Zehent hoeven ze Stalhoven vnd ze Praitenpuech vnd ze Slage vnd avf anderm gvet in dem eigen ze Chirichslage Nv han ich bedacht daz die vorgenanten herren ze Richersperge die got da dienent vnd sant Mychelen der da herre ist nach menem toet ob si einen andern erbe vogit gewinnen vil leiht wuerden mer beswsert denne von mir vnd pin durch got vnd durch sant Mycheles willen und durch meiner vodern vnd durch meiner selben seel willen vnd auch durch div lieb div ich zve den vorgenanten heren han von der vorgenanten vogitai gestanden vnd han mich ier geavzent mit so beschaidener rede Daz ich sie sol haben als ich sei ennen her inne han gehabt vntz an meinen toet vnd danne nach meinem toet vnd ee niht so svllen di vorgenanten herren ob ich an erben stirbe einen vogit vnd einen schermer nemen vber daz vorgenant gvet swen si wellent vnd als ofte si wellent der in aller rehtist sei Gewinne awer ich erben die svllen di selben vogitai haben an chriegch mit allem dem reht vnd si mein vodern vnd ich her haben praht Und daz daz also staet und vnzeprochen behalten werd dar vmb han ich dem vorgenanten Gotshavs ze Richersperge vnd den herren die da got dienent disen brief gegeben mit meinem Insigil verinsigelt Vnd ist daz geschehen ze wiennen nach Christes gebverte vber Tausent iar vnd vber zwei hvndert iar in dem Nivnzigistem iar an sant Symons vnd sant Tathevs tage