Charter Document - 03940034
| Charter Number: | 03940034 |
|---|---|
| Cartulary Title: | Reichersberg, Stift |
| Charter Language: | Latin |
| Charter Origin: | Royal |
| Charter Type(s): | Confirmation |
| Date: | 1195 |
| Date type: | Internal, A.D., Calendar, Regnal |
| Resource Link(s): |
Monasterium.net |
Charter:
In nomine sancte et indiuidue trinitatis heinricus Sextus diuina fauente clementia romanorum imperator semper augvstus et rex Sicilie Ad eterni regis premium et temporalis imperii incrementum nobis proficere non ambigimus si religiosarum personarum postulationibus gratum et benignum prebere curauerimus assensum Inde est quod ad noticiam presentium et futurorum cupimus peruenire quod nos pro salute ac remedio serenissimi patris nostri et nostre peticionem dilecti principis nostri Alberti Salzburgensis archiepiscopi supplicatione quoque arbonis fidelis nostri prepositi de Richersperg ad imitationem memorati felicis memorie genitoris nostri Friderici romanorum quondam imperatoris inuictissimi ipsum arbonem prepositum et ecclesiam Richersperg cum omnibus bonis et personis eidem ecclesie attinentibus sub imperiali nostra protectione recepimus confirmantes eidem ecclesie priuilegium quod a magnificentissimo patre nostro pro bono statu et libertate ecclesie conseruanda ipsi concessum esse dinoscitur et indultum sicut in autentico eius diuali manifeste repperitur exaratum et ex rescripto dicte diualis pagine nobis est declaratum Statuimus autem specialiter et imperiali edicto sanctimus secundum antiquam et primitiuam illius loci libertatem ab ipso fundatore collatam et priuilegiis uenerabilium archiepiscoporum Chvonradi et Eberhardi salzburgensis ecclesie ad quam patronatus pretaxati loci pertinet roboratam ut nullus eivsdem loci sit aduocatus nisi principalis metropolis salzburgensis aduocatus qui de beneficio principalis aduocatie sibi collato predictum cenobivm sine omni grauamine defendat et nullo modo subaduocatum iure beneficiali ibi habeat potestatem constituere nullus quoque alter audeat presumere exactiones uel grauamina fratribus nominati loci uel ministratoribus aut colonis eorum imponere Adicimus autem et imperialis maiestatis auctoritate in perpetuum ualitura statuimus ut bona predicto cenobio siue collata siue adhuc conferenda nullus inuadere aut inde quolibet modo alienare aut ipsum locum dispoliare seu disuestire presumat nisi coram iudicibus legitimis legaliter iusticiam suam conprobauerit Specialiter autem ipse locus deo dicatus secundum priuilegium dilecti genitoris nostri imperiali largitione nostra emunitate gaudeat et nulla iudiciaria secularisue potestas licentiam habeat ibi placitandi concionandi aut quelibet iura secularia exercendi que fratrum inibi deo militantium quietem interrumpere ualeat aut disturbare Si qua uero persona contra hoc priuilegium nostrum temere uenire temptauerit banno nostro subiaceat et sexaginta libras auri in ultionem temeritatis sue conponat quarum medietas camere nostre reliqua pacientibus iniuriam persoluatur Huius rei testes sunt Albertvs salzburgensis archiepiscopus Hermannus monasteriensis episcopus Heinricus wiezburgemis episcopus Otto Frisingensis episcopus Philippus dux Tuscie frater noster Perhtoldus comes de henneberch Poppo comes de wertheim Rvpertus de dvrne Ruopertus de chastele et alii quam plures Acta sunt hec anno dominice incarnationis MCXCV Indictione XIIII Regnante domino Heinrico sexto romanorum imperatore gloriosissimo anno regni XXIIII Imperii uero IIII Data wirzburch Nonas Octobris Signum domini Heinrici sexti romanorum imperatoris inuictissimi et regis sycilie