Charter Document - 03930006

Ich Hainreich von Praitenvelde vergih vnd tvn chunt allen den die disen prief lesent oder horent lesen die nv lebent vnd hernach chumftich sint daz nach hern Ulriches tod des alten von Ruchendorf ain chrieg wart von seinen chinden von svnen vnd toehtern vnd auch von seinem aidem vnd vmb erbe vnd vmb aigen vnd vmb varund guet swie so daz genant ist daz der vorgenante her Vlreich der alt von Ruchendorf lazzen het Denselben chrieg nam wir vns an ich vnd mein pruder her Chunrad von Praitenvelde vnd ander ire vrevnt vnd tailten daz vorgenant guet erbe vnd aigen vnd varund gut swie so daz genant was des vorgenanten hern Vlriches chinden svenen vnd toehtern vnd auch seinem aidem ze rehter fverziht vnd mit ir aller gutem willen also daz ir igleichez mit dem guet daz im beschaiden vnd gefallen was an der tailunge schaffen sollt allen seinen frvm verchauffen versetzzen vnd geben wem iz wold an allem irresal Swaz do gevallen was vern Agnesen dez vorgenanten hern Vlriches tohter iz waer erbe oder aigen oder varund guet daz gab sie irm wirt hern Haymen hern Otten svn ledichlichen vnd mit gutlichem willen ze der zeit do si iz wol getvn moht daz er do mit schaffen sollt allen seinen frvm verchauffen versetzzen vnd geben wem er wolde an zehen phunt gult die si schvef hincz dem heiligen chreutz vnd daz dise sache als hie vor geschriben stet staet vnd vnzebrocben beleib darvber gib ich hern Haymen hern Otten svn von Wienne disen prief ze ainem zevg vnd ze ainem urchund diser sache versigilten mit meinem Insigel