Charter Document - 03920121

Ich Hainreich von Polnhaim vergich vnd tuen chunt allen den di disen brief an sehnt lesnt oder heornt lesn di nu lebnt vnd hernach chumftich sint daz ein chriech gewesn ist zwischen mir ze ainem tail vnd meinem herren dem Ersamen Abt Christan ze Lambach vnd seinem Gotshous ze dem andern tail vmb daz Guet in der Gruennach daz ich mit chouffen in mein gwalt braht het vnd den Levten ouf dem guet ir reht ab gechouft het des chrieges vnd aller der sache di zwischn vns in chrieg waren ez sei vmb schaden der dem Gotshous von mir vnd meinen dienern wideruaren ist oder swy der chriech dar chomen ist das sein wir nach rat vnd Schiedung der Erbern Manne hern Vlrichs von Chappellen vnd hern Eberhartes von Walsse des Lantrichter ob der Ens gentzlich vnd loutterlich verebnt vnd verrihtet also daz ich daz vorgenant guet allez in der Gruennach swy ez genant ist dem vorgenanten abt Christan vnd dem Gotshous ze Lambach ouf gegeben haben ledichlich daz ez ewichlieh vnd an allen chriech daz vorgenant Gotshous angeheorn sol mit allem reht vnd verzeich ouch michs daz ich noch dehain mein Erben ouf daz oft vorgenant guet nimmerme dehain ansprach haben suln wan ich mich des erchenne vnd erchant han vnd bin sein ouch von meinen vriunden den vorgenanten Schidleuten wol vnderweiset daz ich dazselbe guet ze vnreht wider mein gewizzen vnd meiner sel gewahrhait ine gehabt han vnd darvmb han ich ez dem vorgenanten Gotshous ouf gegeben vnd ouch ze bezzerung vmb allen den schaden der dem abt von mir wideruaren ist daz er mir den loutterlich vnd meinen dienern vergebn hat Daz dise Ebenung vnd dise Sache von mir stet vnd vnzerbrochn behalten werde daruber gib ich dem vorgenanten abt Christan vnd dem Gotshous ze Lambach disen brief ze einem ewigen vrchunde beuestent mit meinem anhangunden Insigeln vnd mit hern Vlrichs von Chappellen vnd hern Eberhartes von Walsse baider Insigel di diser Sache Schidleut vnd ebener gewesn sint Darzv han ich gebeten durch bezzere sicherhait dirre sache meinen brueder Philippen vnd meinen vetern wycharten von Polnhaim daz di ir Insigel daran gehangen habent Dirre sache sint Gezwg her wernher von Slyrbach her Otte von Volchenstorf her hainrich von Walsse her Chunrat von Chappellen Chunrat von Volchenstorf Gundaker von Storchnberch Reimpreht von Polnhaim Peter von Harthaim Purchart von Rosenowe vnd ander Erber Levt genueg di da bei waren diser brief ist geschriben vnd gegebn do von Christes geburt waren Tousent iar zwai hundert Jar in dem Nevnten vnd Neuntzkisten Jar des Phintztages an sand Vyncentientag