Charter Document - 03910126

Ich hainreich von Polnhaim vergich vnd tun ze wizzen allen deu disen brief ansehnt lesnt oder heornt lesen di nu lebnt vnd hernach chumftig sint daz ich nach rat vnd schiedung des Erbern Mannes hern Eberharts von walsse des Lantrihter ob der Ens mich mit meinem Herren dem Ersamen abt Friderich von Chremsmunster verrihtet vnd verebnt han gentzlich vnd loutterlich vmb allen chriech vnd vmb allen den Schaden den sein Gotshous vnd sein leut von mir vnd meinen Dienern genomen habent vnd vmb alle sache swy di genant sein also daz ich im oufgegeben han allez daz guet daz das Gotshous ze Chremsmunster ze reht angeheort daz ich in mein gewalt braht het mit chouffen oder swy ez in mein gewalt chomen was swy daz guet genant ist vnd swo daz selb gelegen ist vnd verzeich mich des selben guets daz ich vnd mein erben auf daz guet dehain ansprach furbaz nimmerme gehaben suln danne daz ez daz vorgenant Gotshous ewichlich vnd an allen chriech angeheorn sul Ich sol ouch vmb di driv pfunt gelts di ich im vor diser ebnung gelobt haet ze gebn vnd von aller ansprach von im ledich sein vnd ouch vmb allen den schaden der im vnd dem Gotshous von mir vnd von meinen Dienern wideruaren ist Daz dise sache vnd dise ebenung als hie vor beschaiden ist von mir vnd von meinen Erben stet vnd vnzerbrochn vnd an chriech behalten werde daruber gib ich dem vorgenanten abt Friderichn vnd dem Gotshous ze Chremsmunster disen brief ze einem vrchunde beuestent vnd bestetigt mit meinem anhangunden Insigel vnd mit hern Eberharts Insigel von walsse des Lantrihter vor dem dise ebenung geschehen ist vnd dirre sache Schidman zwischn vns gewesn ist Daruber durch bezzer gehugnusse vnd sicherhait diser sache han ich gebeten meinen Brueder Philippen von Polnhaim weicharden meinen vetern von Polnheim vnd Meinen Ohaim Jansen von Roer daz di ir Insigel daran gehangen habent Dirre sache sint gezivge mein herre Her hainrich der Elter von Schowenberch her wernher von Slierbach Her vlrich von Chappellen her Otte von volchenstorf her Chunrat von Chappellen her hainrich von walsse her Hainrich von Lonstorf Chunrat von volchenstorf Gundaker von Storchenberch vnd ander Erber leut genueg di dabei waren Diser brief ist geschriben do von Christes geburt waren Tousent iar zway Hundert iar in dem Neunten vnd Neuntzkisten Jar des Mitichns an Sanct Agnesn tag