Charter Document - 03910119

Ich Velreich von weidenholtz tun allen den chunt di disen prief ansehent daz ich han gegeben dem goteshause ze Chremsmunster daz aigen an dem Puhel vnd anderiu erb di ich han gehabt da ze Puchchirchen in dem dorf zu einem widerwechsel vmme den hof da ze Raeut vnd schal des aigenz sein giwer sein vnd swaz dem goteshause daran abget daz schullen si haben auf mir vnd auf allen dem daz ich han vnd auf meinen Prudern Marchharten vnd Diethern vnd auf andern meinen erben Daz daz staet belaeibe darvmme gibet mein herre her hainreich von schawenberch sein insigel ze zeug an disen prief vnd her waeichhart von Pollenhaim auch ze zeug mit seinem Insigel Dez ist zeug her Seibrant von geltingen vnd her Rudolf der Schifer vnd her herman von Egendorf vnd Vlreich der Rot vnd Reichher von edelspach vnd vlreich von geltingen vnd wernhart der amman vnd Chunrat sein aidem vnde ander di dapaei sint gewesen Der prief ist gegeben nach christes geburt am dem tausentisten iar vnd an dem zwaihundertisten vnd an dem neunzkisten vnd ain iar