Charter Document - 03910116

Jch Hainreich von Lonstorf vnd Otte mein pruder tuen chunt allen den di disen prief sehent oder lesent daz ver Tuet heren Dietreihs hausvrowe von Ebelsperch hat von vns ze lehen ein Guet datz Obernweidach des ist fumfthalb schillinch geltes vnd swaz dev stevr vergelten mach daz wir di Aigenschaft desselben Guetes ir auh gegeben haben also daz si daz selbe Guet sol schaffen ab ir sel dem Goteshavs hintz Chremsmunster vnd durch aller der sel willen der Aigen oder Lehen iz gewesen ist Vnd daz daz staet vnd vnverchert beleib so hab wir disen prief ir gegeben versigelten mit unsern Insigeln Vnd sind des gezevg Der Gebhart der Pharrer von Ebelsperch Der Dietreich der Amman Der Perhtolt von harthaim Der Wernhart von Harthaim Rueger von hutte Der hierzze vnd sein Aidem der Vreie vnd pider genueg Iz ist daz auh geschehen do van vnsers herren geburt sint gewesen Tausent Jar zwai Hvndert Jar vnd Ochtte vnd Ahttzich Jar