Charter Document - 03910113

Nos Weikhardus Chunradus Albero Raimbertus Weikhardus fratres de polnhaim per presencia profitemur quod cum inter Ecclesiam Beati Agapiti Martiris in Chremsmunster ex una parte et nos ex altera iam diu lis et contencio verteretur super captura piscium que fieri solet in loco ubi lacus qui Albense dicitur influit fluvio Albe quod vulgariter lancwat vocatur tempore autumpnali Tandem mediantibus probis et honestis viris ad concordiam reuocati receptis a domino Friderico Abbate eiusdem monasterii quatuordecim libris denariorum Wiennensium renunciauimus omni iuri siue impeticioni que nobis in eadem piscatione competere videbatur Idemque Abbas et Ecclesia predicta libero et pleno iure eiusdem piscationis gaudebunt in solidum et nos cum omni posteritate nostra nullum eisdem de cetero dampnum sev preiudicium per nos siue aliquos ex nostris fieri sinemus Sed ex nunc omni actioni cedimus siue liti immo et manum nostre defensionis contra omnes in tali suo iure ipsos grauare volentes quantum possumus eisdem prestabimus in futurum Et quia nemore nostro idem lacus cingitur circumquaque ne de cetero inter idem monasterium et nos nostrosque heredes alicuius oriatur materia questionis piscatores ecclesie ligna ad vsum piscationis necessaria de nemore eodem accipient habundanter nullo nostrum vel nostrorum in hoc siue in omni iure suo quod in eadem piscatione videlicet totalis lacus per totum annum siue predicta autumpnali captura quiete debent perenniter possidere eidem monasterio aliquod impedimentum sev grauamen irrogante publice vel occulte Vt igitur hec vniuersa et singula perpetuo maneant inconvulsa presentem cartam cum subnotatione testium nostrorum sigillorum karacteribus roboramus appositis nihilominus sigillis domini Weikhardi senioris de polnhaim patrui nostri et domini Johannis de Ror qui interfuerunt huic compositioni cum testibus infrascriptis qui sunt hii Dominus Weikhardus predictus Ortolfus Hainricus philippus Albero fratres de polnhaim Erkhingerus de Wesen dominus Ruedigerus de Vtenstedin dominus theodericus de Ebelsperch dominus Gotfridus de pernowe dominus hermannus de Egendorf Otto de Ahleiten Hainricus Lawarius Reicherus de Edelspah Chunradus holzmann Vlricus Rufus Tiemo de Eginberg Tristramus de Aich Thiemo de pernaw et Alii quam plures qui huic facto interfuerunt audiuerunt pariter et viderunt Actum Anno Domini MCC octogesimo septimo Nonis Septembris