Charter Document - 03910073

Nos Ortolfus dei gracia de Chremsmvnster abbas et omnis eiusdem ecclesie conuentus omnibus Christi fidelibus tam presentibus quam futuris presenti scripto duximus intimandum quod nos communi consilio et assensu Vlrico cognominato de Pvoch et uxori sue filie scilicet Friderici de Palsentz et pueris eiusdem ac eorundem puerorum heredibus et posteritati curtem in Galspach ad nostram cameram pertinentem hereditario iure contulimus liberaliter cum effectu ad censum X solidorum Wiennensis monete nobis inde annis singulis soluendorum hac interposita pactione quod annis singulis ut dictum est camerario ecclesie nostre ad quem eadem curtis pertinet quinque solidi de predicto censu in Natiuitate beate virginis Marie et residui quinque solidi in festo beati Andree apostoli persoluantur Si uero in eisdem certis diebus ac terminis antedictis datus non fuerit ut premisimus idem census tunc ultra XIIII dies proxime secuturos LX denarij pro satisfactione que Wandel vvlgariter appellatur dentur camerario memorato eciam cum censu debito et statuto Si autem idem census pluries antedictus detentus fuerit contumaciter unum annum ac etiam altero anno cum satisfactione supradicta non fuerit nobis datus ex tunc eadem curtis cum omnibus ad eam pertinentibus sine totius contradictionis impedimento in liberam ecclesie nostre possessionem precise redeat sicut prius iure hereditario quod prefato VI et uxori sue ac pueris et heredibus eorundem in ipsa curte ut premisimus collatum est penitus expirante Insuper hoc adiecto quod si eandem uxorem Vlrici filiam supradicti Friderici sine heredibus decedere contigerit ex hac uita tunc curtis eadem pueris prioris uxoris dicti VI cedat ex integro illo iure quod superius est prescriptum Hanc preterea interponimus pactionem ut si inter possessores sepe dicte curtis et alios nostros homines sibi uicinos litem aut aliquid questionis contigerit suboriri illud ad nostram siue ad nostrorum officiatorum audienciam deferatur qui statim prout iustitia dictauerit et pro consilio uicinorum illud determinent et explanent Vt autem huius nostre collacionis ac interposite pactionis memoria nostris temporibus et post nos in perpetuum sine lite ac sine omni dubitacione firmiter perseueret nos eam instrumento presenti nostris sigillis consignato in testimonium confirmamus testibus subnotatis Ernsto et Chunradus de Aschperch Hertwicus de Mvlperch Chunradus de Schachen Ernsto de Stein Merboto de Od Chvnradus de Vurt Sybrandus de Gelting Heinricus Pernvtzel Heinricus de Chlingelprvnn et alij quam plures Acta sunt hec XII kal Septembris anno dominice incarnacionis MCCLII