Charter Document - 03910072

In nomine domini Amen Ortolfus dei gratia abbas in Chremsmunster et Conuentus Cum humane fragilitatis condicio semper sit mobilis ad instabilitatem necessarium est et dignum ut res geste perpetuo mansure ne vitio instabilitatis et processu temporis in contradictionem aliquam venire ualeant et obliuionem certis litterarum testimoniis roborentur Cunctis itaque tam presentibus quam futuris christi fidelibus presenti scripto duximus intimandum quod nos communi consilio et assensu Friderico de palsenz et omni posteritati sue curtem apud Sibenbach que nuncupatur in dem Ceilch cum omnibus pertinentiis suis ad custodiam ecclesie nostre pertinentem hereditario iure contulimus ad censum duodecim solidorum annuatim soluendorum wiennensium monete tali mediante ac interposita pactione quod singulis annis ecclesie nostre custodi ad quem eadem curtis pertinet sex solidi de predicto censu in Natiuitate beate Marie virginis et reliqui sex solidi in festo beati Andree Apostoli persoluantur Et quandocumque huiusmodi census in premissis et statutis terminis datus non fuerit tunc ultra Quatuordecim dies proxime secuturos Sexaginta denarii pro satisfactione que vvlgo wandel appellatur dentur etiam [cum] censu debito et statuto Si vero idem census contumaciter sine legitimo impedimento detentus fuerit vnum annum ac etiam datus non fuerit secundo anno ex tunc eadem cum omnibus que ad ea pertinent precise sine tocius contradictionis impedimento in liberam ecclesie nostre possessionem redeat ac dicionem iure hereditario quod predicto Friderico ac sue posteritati in eadem curte ut premisimus collatum est penitus cessante Preterea etiam hanc adiecimus pactionem vt quicumque curtis eiusdem fuerit possessor ille reliquis hominibus in bonis ecclesie nostre in supradicta villa Sibenbach sibi contigua et vicina residentibus inferre vim aliquam non presumat nec eis ius ipsorum quod in campis in siluis et pascuis ac inviis habere debent non infringat vel minuat ullo modo Hoc etiam adiecto quod si inter possessorem sepe dicte curtis ac inter memoratos homines in bonis ecclesie nostre in prefata villa Sibenbach residentes litem aut aliquid questionis de bonis ecclesie nostre contingeret suboriri ad nostram siue nostrorum officiatorum audientiam deferatur qui illud prout iusticia dictauerit ac etiam pro consilio vicinorum determinent et complanent Vt autem hec nostra collatio simul et interposita pactio nostris temporibus ac sine dubitatione post nos imperpetuum firmiter perseueret nos eam presenti instrumento sigillis nostris et dominorum de Schowenberch ac etiam domini Alberonis de Pollnheim in testimonium confirmamus ad cautelam habundatiorem testibus annotatis Domini de Schowenberch Wernhardus et Henricus Dominus Albero de pollnheim Hertwicus de Mvlberch Chunradus de Aschperch Heinricus Zant Ernsto de Stein Merboto de Ode Chunradus de Schachen Hertwicus Zant Hertwicus de Hecking Eberhardus Schregier Hertnidus filius dapiferi Chunradus de Furt Wernhardus et pernoldus fratres chemnatenses Heinricus de chlingelprunne Chunradus rot Chunradus et Ludwicus fratres de Streichen Vlricus iudex et alii plures Acta sunt hec V kalend Martii Anno dominice Incarnationis MCCLI Apud welsam