Charter Document - 03910066

Innocentius episcopus seruus seruorum dei Dilectis filijs Abbati chremsmonasterij eiusque Fratribus tam presentibus quam futuris regularem uitam professis Inperpetuum Religiosam uitam eligentibus apostolicum conuenit adesse presidium ne forte cuiuslibet temeritatis incursus aut eos a proposito reuocet aut robur quod absit sacre religionis infringat Quapropter dilecti in domino filij uestris iustis postulationibus clementer annuimus et Monasterium Chremsemonasterij Patauiensis diocesis in quo diuino estis obsequio mancipati sub beati Petri et nostra protectione suscipimus et presentis scripti priuilegio communimus In primis siquidem statuentes ut ordo monasticus qui secundum deum et beati Benedicti regulam in eodem Monasterio institutus esse dinoscitur perpetuis ibidem temporibus inuiolabiliter obseruetur Preterea quascumque possessiones quecumque bona idem Monasterium impresentiarum iuste et canonice possidet aut in futurum concessione Pontificum largitione Regum uel Principum oblatione fidelium seu alijs iustis modis prestante domino poterit adipisci firma uobis uestrisque successoribus et illibata permaneant In quibus hec proprijs duximus exprimenda uocabulis Locum ipsum in quo prefatum monasterium situm est cum omnibus pertinentijs suis Parrochialem ecclesiam de Kirichperch cum decimis et omnibus pertinentijs suis quam bone memorie Theobaldus Patauiensis Episcopus Capituli sui accedente consensu Monasterio uestro pia et prouida liberalitate concessit Ecclesias de Ror inferiori et superiori cum omnibus pertinentijs suis de Chemnaten de Halle de Riede et de Weizchirichen parrochiales ecclesias cum omnibus decimis et pertinentijs suis sancti Egidij in Ponte et de Cell ecclesias cum omnibus decimis et pertinentijs suis de Welse de Taleheimen de Puohchirichen et de Warcpercheum parrochiales ecclesias cum omnibus decimis et pertinentijs suis ecclesiam de chirichtorf cum decimis et omnibus pertinentijs suis Parrochialem ecclesiam de Gersten cum decimis et aliis pertinentijs suis Parrochialem ecclesiam de Stemmechirichen cum omnibus cellis Capellis decimis et aliis pertinentijs suis Parrochialem ecclesiam de Vihet Wanch cum omnibus pertinentijs suis parrochialem ecclesiam de Monte sancti Martini cum omnibus pertinentijs suis ius patronatus eiusdem ecclesie et predium que ex dono quondam Alheidis Comitisse de Hohemburch et filiorum eius habetis ibidem ecclesiam in Phestol cum omnibus pertinentijs suis Jus patronatus quod in predictis parrochialibus ecclesiis obtinetis predium quod a flumine Norebach seorsum usque in Chremsam quondam dux Bawarie prout spectabat ad eum Monasterio uestro pia et prouida liberalitate donauit Mansum unum in Halle unum Mansum in Monte uicino necnon et possessiones uestras alias cum pratis uineis terris nemoribus usuagijs et pascuis in bosco et planno in aquis et molendinis in uijs et semitis et omnibus alijs libertatibus et immunitatibus suis Sane noualium uestrorum que proprijs manibus aut sumptibus colitis de quibus aliquis hactenus non percepit siue de uestrorum animalium nutrimentis nullus a uobis decimas exigere uel extorquere presumat Liceat quoque uobis clericos uel laicos liberos et absolutes e seculo fugientes ad conuersionem recipere ac eos absque contradictione aliqua retinere Prohibemus insuper ut nulli fratrum uestrorum post factam in Monasterio uestro professionem fas sit sine Abbatis sui licentia nisi artioris religionis obtentu de eodem loco discedere Discedentem uero absque communium litterarum uestrarum cautione nullus audeat retinere Cum autem generale interdictum terre fuerit liceat uobis clausis ianuis exclusis excommunicatis et interdictis non pulsatis campanis suppressa uoce diuina officia celebrare dummodo causam non dederitis interdicto Chrisma uero oleum sanctum consecrationes altarium seu basilicarum ordinationes clericorum qui ad ordines fuerint promouendi a diocesano suscipiatis Episcopo siquidem catholicus fuerit et gratiam et communionem sacrosancte Romane sedis habuerit et ea uobis uoluerit sine prauitate aliqua exhibere Prohibemus insuper ut infra fines parrochie uestre nullus sine assensu diocesani Episcopi et uestro Capellam seu Oratorium de nouo construere audeat Saluis priuilegijs Pontificum Romanorum Ad hec nouas et indebitas exactiones ab Archiepiscopis et Episcopis Archidiaconis seu Decanis alijsque omnibus ecclesiasticis secularibusue personis a uobis omnino fieri prohibemus Sepulturam quoque ipsius loci liberam esse decernimus ut eorum deuotioni et extreme uoluntati qui se illic sepeliri deliberauerint nisi forte excommunicati uel interdicti sint aut etiam publice usurarij nullus obsistat Salua tamen iustitia illarum ecclesiarum a quibus mortuorum corpora assumuntur Decimas preterea et possessiones ad ius ecclesiarum uestrarum spectantes que a laicis detinentur redimendi et legitime liberandi de manibus eorum et ad ecclesias ad quas pertinent reuocandi libera sit uobis de nostra auctoritate facultas Obeunte uero te nunc eiusdem loci Abbate uel tuorum quolibet successorum nullus ibi qualibet surreptionis astutia seu uiolentia preponatur nisi quem fratres communi consensu uel eorum maior pars consilij sanioris secundum deum et beati Benedicti regulam prouiderint eligendum Paci quoque et tranquillitati uestre paterna inposterum sollicitudine prouidere uolentes auctoritate apostolica prohibemus ut infra clausuras locorum uestrorum nullus rapinam seu furtum facere ignem apponere sanguinem fundere hominem temere capere uel interficere seu uiolentiam audeat exercere Preterea omnes libertates et immunitates a predecessoribus nostris Romanis Pontificibus Monasterio uestro concessas nec non libertates et exemtiones secularum exactionum a Regibus et Principibus uel aliis fidelibus rationabiliter uobis indultas auctoritate apostolica confirmamus et presentis scripti priuilegio communimus Decernimus ergo ut nulli omnino hominum liceat prefatum Monasterium temere perturbare aut eius possessiones auferre uel ablatas retinere minuere seu quibuslibet uexationibus fatigare sed omnia integra conseruentur eorum pro quorum gubernatione ac sustentatione concessa sunt usibus omnimodis profutura Salua sedis apostolice auctoritate et diocesani Episcopi canonica iustitia et in predictis decimis moderatione concilii generalis Siqua in futurum igitur ecclesiastica secularisue persona hanc nostre constitutionis paginam sciens contra eam temere uenire temptauerit secundo tertioue commonita nisi reatum suum congrua satisfactione correxerit potestatis honorisque sui careat dignitate reamque se diuino iudicio existere de perpetrata iniquitate cognoscat et a sacratissimo corpore ac sanguine dei et domini redemptoris nostri Jesu Christi aliena fiat atque in extremo examine districte subiaceat ultioni Cunctis autem eidem loco sua iura seruantibus sit pax domini nostri Jesu Christi Quatinus et hic fructum bone actionis percipiant et apud districtum Judicem premia eterne pacis inueniant Amen Ego Innocentius Catholice ecclesie Episcopus ss Ego Oto portuensis et Sancte Rufine Episcopus ss Ego Petrus albanensis episcopus ss Ego Petrus tituli sancti Marcelli presbiter cardinalis ss Ego Willhelmus basilice duodecim Apostolorum presbyter cardinalis ss Ego frater Hugo tituli sancte Sabine presbiter cardinalis ss Ego Ottauianus sancte Marie in Via lata diaconus Cardinalis ss Ego Petrus sancti Georgij ad uelum aureum diaconus Cardinalis ss Datum Lugduni per manum Magistri Marini sancte Romane ecclesie Vicecancellarij XII kal Februarii Indictione V Incarnationis dominice Anno MCCXLVI Pontificatus uero domini Innocentij pape IIII Anno Quarto