Charter Document - 03910064
| Charter Number: | 03910064 |
|---|---|
| Cartulary Title: | Kremsmünster, Stift |
| Charter Language: | Latin |
| Charter Origin: | Religious |
| Charter Type(s): | Decree |
| Date: | 1242 |
| Date type: | Internal, A.D., Calendar, Episcopal |
| Resource Link(s): |
Monasterium.net |
Charter:
Rudegerus Dei Gratia Patauiensis Episcopus Imperpetuum Cum ad regimen et in partem sollicitudinis Pastoralis Officii diuina simus prouidentia euocati summe perspicacitatis conamine in ipso diuina suffragante gratia laborare taliter optamus principaliter tamen sic nos gerere in prouisionibus Subditorum ut talento nobis credito cum fenore multiplici reportato in gaudium Domini introire et eternorum premiorum mereamur dulcedine saciarj Sane cum propter hominum obliuionem et temporis labilem decursum res geste adnichilari consueuerint si tenaci scriptorum memoria non firmentur ea que per nos aguntur temporaliter perpetuare nostris scriptis consueuimus ad cautelam Hinc est quod innotescere cupimus tam presentibus quam futuris quod cum Ecclesia in Chremsmunster propter multiplicem hominum maliciam et miserabilem statum terre et temporis irrecuperabiliter redacta ad nichilum et oppressa de profundo miserie nostri subsidij peteret humiliter adiuuamen nos ipsius anxietatibus paterno affectu compassi cogitauimus qualiter eius esset inopie succurendum recognoscentes quod eidem Ecclesie ex eo quod de corpore Patauiensis Ecclesie creata esset in suis necessitatibus adesse teneremur specialiter et fauorabiliter cum effectu vnde de communicato consilio Capituli nostri Ecclesiam in Weizchirchin ad ipsorum donationem spectantem cum omnibus prouentibus ipsius in usus et in subsidium prebenda et consolationis Fratrum et Conuentus diuine retributionis intuitu dedimus et donauimus liberaliter perpetuo possidendam hoc tamen adiecto quod Conuentus Ecclesie prefate dictam Ecclesiam in Weizchirchin sibi datam reconpensationis nomine pro quibusdam prediis et decimis sitis in Pago et villa Alburch quas ab Abbate et Conuentu dicte Ecclesie in Chremsmunster in proprium recepimus debeat nihilominus possidere Ne autem super hac nostra donatione dicto Conuentuj ualeat inposterum calumpnia suboriri presentem paginam qua ipsam donationem confirmamus cum Sigilli nostri appensione ipsi Conuentui in testimonium dedimus et cautelam Datum Patauie Anno Domini Millesimo CCXLII XII kalend Septembris Indictione Quintadecima Pontificatus nostri Anno Decimo