Charter Document - 03910040
| Charter Number: | 03910040 |
|---|---|
| Cartulary Title: | Kremsmünster, Stift |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1186 |
| Date type: | Assigned |
| Resource Link(s): |
Monasterium.net |
Charter:
Vrbanus Episcopus servus servorum Dei dilectis filiis Garstensi et Sitastensi Abbatibus Salzpurgensi et Sancti Floriani Prepositis salutem et Apostolicam benedictionem Cum nostris fuisset olim auribus intimatum quod dilectus filius noster Abbas Sancti Georgii in Abbatem Chremis Monasterii esset electus quia per impressionem quorundam laicorum dicebatur inductus et quedam alia proponebantur contra electionem ipsius de consilio fratrum nostrorum eandem electionem duximus irritandam et vobis filii Prepositi super ordinatione ipsius Cenobii litteras curavimus Apostolicas destinare Verum quia fratres prefati Cenobii eundem Abbatem voluntate communi dicuntur denuo elegisse timentes ne in electione ipsa fuerit facta violentia vel aliud quod Canonicis obviet institutis cognitionem ejusdem negotii vobis duximus committendam discretioni vestre per Apostolica scripta mandantes quatenus locum illum pariter accedentes inquiratis que circa electionem ipsam fuerint inquirenda et si eam Canonice et absque pravitate vel impressione aliorum factam noveritis nullius contradictione vel appellatione obstante ratam decernatis habendam et precipiatis Abbati ut auctoritate nostra recipiat administrationem Cenobii memorati Monasterio priore dimisso proviso tamen quod in adventu suo Monasterium quod reliquit non aggravet auferendo bona ipsius Injungatis etiam fratribus ejusdem Cenobii ut alium provideant sibi Abbatem Mutationem autem sic fieri debere mandamus si utilius Cremisi Monasterio quam alteri per eum videritis providendum