Charter Document - 03910006
| Charter Number: | 03910006 |
|---|---|
| Cartulary Title: | Kremsmünster, Stift |
| Charter Language: | Latin |
| Charter Origin: | Royal |
| Charter Type(s): | Grant |
| Date: | 0877 |
| Date type: | Internal, A.D., Calendar, Regnal |
| Resource Link(s): |
Monasterium.net |
Charter:
In nomine Sancte et individue Trinitatis Karlomannus divina favente gratia Rex Si circa casas et Monasteria Dei benefica opportuna non desistimus agere non solum regium morem decenter implemus verum etiam eterne beatitudinis premium nos promereri inde liquido credimus Quapropter notum sit omnibus fidelibus sancte Dei Ecclesie nostrisque scilicet presentibus et futuris quomodo nos pro divini cultus amore et reverentia Sanctorum illius cogitavimus quasdam res proprietatis nostre tradere ad Monasterium quod dicitur Chremisa quod esse cernitur constructum in honore Salvatoris Domini nostri Jesu Christi in pago qui dicitur Trungowe Et hoc est quod illuc tradidimus id est hubas quinque jacentes in pago nuncupato Tunahgowe in villa que vocatur Alburch et Barschalcum unum cum huba sua in loco qui dicitur Epilinga cum terris cultis et incultis agris pratis pascuis sylvis aquis aquarumve decursibus et omnibus adjacentijs et pertinentijs suis Hec autem omnia ex integro ad prefatum Monasterium per presentem auctoritatem nostram tradidimus atque de jure nostro in jus et dominationem ejus ea transfundimus ut ab hodierna die et deinceps ob redemptionem anime nostre et animarum genitoris et genitricis nostre nec non et anime dulcissime conjugis mee illuc perpetualiter pertineant et Rectores et Prepositi Monasterij illius inde faciant atque disponant ad utilitatem ejus secundum quod eis placeat nullo unquam successore nostro hanc traditionem nostram irrumpente vel inquietante sed Deo auxiliante perpetuis temporibus firma et inviolabilis permaneat Et ut hec auctoritas largitionis nostre per cuncta futura secula inviolabilem in Dei nomine obtineat vigorem manu propria nostra subter eam confirmavimus et annulo nostro assigillari jussimus Signum Domini Karlomanni pijssimi Regis Baldo Cancellarius ad vicem Theotmari Cancellarij recognovit Datum III Non Decemb Anno Christo propitio II regni Domini Karlomanni invictissimi Regis in Wawaria et I in Italia Indictione X Actum ad Oetingas curte regia in Dei nomine feliciter Amen