Charter Document - 03900065

Wir Bropst Hadmar von gotes genaden dacz Newnburch tuen chunt an disem prief die nv sint vnd hernach chunftich werdent daz Alber von Pusenperge hat vns aufgegeben ain halbes Lehen ze Trestorf rechtes aygens vnd ist auch dar vmb vnser scherm worden mit guetem willen vber die vorgenanten aygenschaft also alles aygens recht ist So hab wir mit vnser Samnvnge gueter willen daz vor genant halb lehen daz Chvnrat der Reus vor gehabt hat ze rechtem purchrecht Hainreichen dem Rosenberger von Trestorf der iz redleichen vnd recht von demselben Chvnraten gechauft hat ze rechtem purchrecht also verlihen daz er vnseren gotshaus dienen schvl alle iar an sant Michelstag dreizzich wiener phenning vnd schvl auch von vns nicht beswert werden mit fur mit nacht seld noch mit nicht anders vnd das selb halb lehen schul wir vnd vnser samnvng div nv ist oder hernach chunftich wirt vorantwurten an aller stat als recht ist Dar vber ze ainer vrchvnde hab wir dem vorgenanten Hainreichen disen prief gegeben versigelt mit vnserm insigel Dar zv so gestat wir des daz derselb Hainreich daz vorgenant halb lehen swem im sein durft geschech verchavffen mvge oder ain tail achkers da von doch also daz vnser dienst icht wert geminnert oder versovmet vnd daz selb lehen svl er pawen swa er hin welle Daz Recht geb wir auch den swer daz selb halb lehen dacz im chauffet Dez sint gezeug her Nycolaus her Chol der amman her fridreich der huetstoch her herman ymian her wernhart der schiver her Pernhart vnd her Vlrich von Riczendorf Albrecht der Sybenhos Ortwein Prechtel der Schreiber Chvnrat von Muchkerowe Levpolt vntter der louben herman hern Wisentes svn Dietreich der vleischacher Vlreich der leitgeb Seyfrit vnd sein svn Chvnrat herman hinter dem prunne Eberger wisentes svn Hainrich der Chapeller fridreich des huetstoch svn herbort der heczlingsperger Ott Ludweiges svn Dietreich von Steten vnd ander leut genuech Diser prief ist gegeben dacz Nevnburch da von Christes geburt waz Tausent zwai hvndert jar Newnczig vnd acht iar an sant Vrbans tage