Charter Document - 03900063

Ich Wernhart der Chernerprunner tuen allen den chunt die disen prief ansehent daz Pernhart der Naternpech dacz Hagenprunne hat gehabt zwai lehen die sein recht aygen sint gewesen die habent im gedient alle iar vierczehen schilling phenning vnd von ainem accher acht phenning zu der selben aygenschaft vnd zu der selben gult han ich rechtes gegehen ze rechten aygen nach vorgenanten Pernharts tode Des selben rechtes han ich mich furgezicht getan vnd hat der vorgenant Pernhart die vorgenanten aygenschaft vnd gult aufgegeben dem erbern manne Brobst Hadmarn vnd der Sammunge des gotshaus ze Neunburch mit meinem guetleichen willen Daz daz furbaz stet beleibe so han ich dem erbern gotshaus vnd der Sammunge ze Neunburch gegeben disen prief mit meinem insigel fur alle ansprach vnd wierd sein scherm fur alle ansprach als aygens recht vnd landes recht ist Des ist geczevg her Chol der amman her Otto der schench her Wernhart der schiver her herman ymian die Ritter Gerunch hern Chvln svn Dietreich der schiver Chvnrat der hutstoch vnd ander leut genuech Diser prief ist gegeben do von christes gepurt was Tausent iar zwai hvndert iar in dem achten vnd nevnczigisten iar an dem nachsten Svnntage vor dem Aschtage