Charter Document - 03900062

Ich Pernhart der Naternpech tvn chvnt allen den di disen prief ansehent daz ich ze hagenprunne gehabt han zwai lehen die dienent vierczehen schilling vnd von ainem accher acht phenninge daz mein rechtes aygen ist gewesen die selben aygenschaft vnd dieselben gult han ich aufgegeben dem erbern manne Probst Hadmarn vnd der sammenunge des gotshauses ze Neunburch da ich daz wol getvn mochte vnd hat mir dar omb gegeben her fridreich der hutstoch achczehen phvnt wienner phenninge vnd pin auch warten des Probst vnd der sammenunge des gotshauses zu Nevnburch der vorgenanten aygenschaft vnd auch der gult rechter scherm als aigens recht ist vnd auch des landes recht Dar czv ist scherm warten mit sampt mir weyngand von Pabstorf vnd Dietmar von Rohrbach nach des Landes recht Daz disev rede furbaz stet beleibe ewichlichen des gib ich Pernhart dem vorgenanten gotshaus vnd der sammenvnge ze Neunburch disen prief versigelt mit mainem insigel zv ainem vrchvnde vnd zv ainer sicherhait fur alle an sprach Diser sache sint geczevg her Chol der Amman herr Ott der schench her wernhart der schiver her herman ymian die Ritter Gervnch hern Choln svn Ditel der schiver Chvnrat der hutstoch vnd ander leut genuech Diser prief ist gegeben do von christes geburt was Tousent iar zwai hvndert iar vnd in dem achten vnd newnczigisten iar an dem nachsten Svnntag vor dem Aschtage